Доколку некој од вработените според Рамковниот договор, кои сега седат дома и примаат плата, двапати одбие опција за ангажман во некоја од институциите, ќе му биде раскинат работниот однос, најави денеска министерот за информатичко општество и администрација Јетон Шаќири.
За нивно распоредување во понеделникот на владина седница беше утврден и предлог-закон. Шаќири вели дека целта е да се реши десетгодишниот проблем и да се оствари владината програма без дополнителни финансиски импликации.
По усвојување на законот, министерствата за политички систем и за информатичко општество ќе ги вкрстат податоците и ќе подготват список, при што, како што рече министерот, ќе се земат предвид професионалната подготовка на сите кандидати и годишните планови на институциите за 2021 година.
„Јас би посакал за сите вработени кога ќе се подготви програмата за префрлање да се има предвид и нивната професионална подготовка и локациите од каде доаѓаат. Истовремено, по подготвување на списокот, тие што нема да прифатат, според нацрт-законот, ќе се префрлат во трансфер-листата на Министерството за информатичко општество. Во таа трансфер-листа ќе се понуди и втора опција, но ако не го прифатат и тоа, ќе се раскине работниот однос на тие што нема да го прифатат и вториот предлог. Ова е добар нацрт-закон и сите треба да имаме предвид дека е решавање на долгорочен проблем“,
рече Шаќири.
Министерот вели дека посакува на трансфер-листата да има што помалку вработени и процесот да заврши во првата фаза и најавува дека со новите законски решенија ќе се објасни временскиот рок, односно колку време максимум овие лица ќе можат да бидат на листата.