Во спротивно, Мицкоски станува соучесник или политички фактор кој можеби од таквата состојба има интерес, вели претседателот на СДСМ, Венко Филипче
Лидерот на опозицискиот СДСМ, Венко Филипче го повика премиерот Христијан Мицкоски доколку поседува какви било информации за можна дестабилизација или нарушување на мирот во земјата, итно да ги сподели со надлежните институции.
Филипче, во објава на Фејсбук, напиша оти смета дека во спротивно, Мицкоски станува соучесник или политички фактор кој можеби има интерес од таквата состојба.
„Информациите за дестабилизација кои два дена по ред ги пласира премиерот предизвикуваат немир кај граѓаните, а негова лична одговорност е да превенира таква состојба. Доколку тој сам не ги сподели информациите, ги повикувам истражните органи да поведат постапка и да ги истражат овие наводи“,
напиша Филипче на Фејсбук.
Филипче вели дека како претседател на СДСМ секогаш се спротивставува на какви било форми на дестабилизација.
„Исто така, не смее да се дозволат ниту манипулации со чуствата на граѓаните и предизвикување состојба на тензија, без конкретна акција од страна на државата“,
порача тој.
Инаку, денеска на прес-конференцијата што ја имаше заедно со косовскиот премиер Албин Курти, премиерот Христијан Мицкоски рече дека има информации, добиени од повеќе канали, дека раководството на Демократската унија за интеграција (ДУИ), како што рече, во обид да го заштити капиталот што го создаваше изминатите 20 години, ќе преземе чекори во насока на дестабилизирање на државата. Тој дополни дека според информациите што ги има, се очекува тоа да се случи оваа есен.
„Ние како влада имаме целосно право да ги браниме територијалниот суверенитет, интегритетот и мирот на граѓаните. Тоа е и целта на една држава. Врз основа на тие информации што ги имаме, очекуваме тоа да се случи оваа есен. Да почекаме времето да даде одговор, дали тие информации ќе се потврдат или нема да бидат точни“,
рече Мицкоски.