„На операторот со храна наредени му се превентивни мерки за темелно механичко и хемиско чистење на објектот, опремата и приборот, вонредна дезинфекција и вршење на вонредни санитарни прегледи на вработените лица“, велат од АХВ
Кујната на пицерија-ресторан во Гостивар е затворена од инспекциските служби на Агенцијата за храна и ветеринарство (АХВ) до добивање на резултатите од земените примероци за лабораторсико испитување.
Проверката на пицеријата-ресторан доаѓа откако вчера девет лица со симптоми на труење биле примени во гостиварската болница.
Од АХВ велат дека мостри за лабораториско испитување биле земени од пилешки стек, свежа марула и мајонез, како и брисеви од работните површини, опремата и приборот и од вработените лица.
„На операторот со храна наредени му се превентивни мерки за темелно механичко и хемиско чистење на објектот, опремата и приборот, вонредна дезинфекција и вршење на вонредни санитарни прегледи на вработените лица“,
велат од Агенцијата за храна и ветеринарство.
АХВ апелира во услови на високи надворешни температури, операторите и потрошувачите да внимаваат на безбедноста на храната со цел, како што велат, спречување на ризици од појава на можно труење со храна.
Од Агенцијата велат дека секој сомнеж поврзан со безбедноста на храната може да се пријави на бесплатната телефонска линија за потрошувачите 0800 3 22 22, а претставки може да поднесат и лично во Агенцијата, или во нејзините подрачни единици, како и електронски на [email protected].
Вкупно девет лица вчера биле згрижени во Инфективното оддление во гостиварската Болница, со симптоми на труење. По дадената терапија сите се испратени дома и нема потешки случаи.
Дежурниот лекар во Одделението за МИА информираше дека синоќа во периодот од 22 часот до полноќ биле примени пациенти на помлада возраст кои претходно се јавиле во Брза помош.
„Сите се жалеа на повраќање, дијареја и изнемоштеност. По направените анализи на крвта и прегледите им беше дадена соодветна терапија и се пуштени на домашно лекување“,
изјави инфектологот Ратко Наумоски.
Во четвртокот од АХВ информираа дека превентивно е затворена сендвичарница во скопската населба Аеродром поради сомнеж за труење со храна кај девет лица.
Два дена претходно, откако четири лица беа примени на Инфективната клиника со симптоми на труење од храна, затворена беше гостилница во скопската населба Влае.