Охридскиот, Преспанскиот и Договорот за добрососедство со Бугарија се алфа и омега за мирот, стабилноста и безбедноста во земјава, како и црвените линии што ДУИ нема да ги премине во постизборното коалицирање.
Ова во интервју за МИА го порача лидерот на ДУИ, Али Ахмети, кој потенцира дека не може да имаат партнерство со некој што има цел или прави обиди за прекршување на овие договори, кои, како што рече, ги релаксирале меѓуетничките односи во земјата.
„Значи, секој што се обидува да ги прекрши овие договори на кој било начин, не може да биде партнер со нас, затоа ние сме многу отворени и искрени и го направивме предупредувањето навремено“,
рече Ахмети.
Во врска со идејата за премиер Албанец, тој вели дека и на претседателските избори излегле со свои предлози за шеф на државата, но тогаш процениле дека Пендаровски ќе биде поприфатлив кандидат и целосно се ангажирале тој да ја добие поддршката.
„Ние направивме чекор и сега е време кога треба да ни возвратат со исто. Овие чекори сме ги презеле во оваа насока со најдобра намера, да им упатиме порака на граѓаните и на сите луѓе дека земјата напредува само кога сме во комуникација и соработка едни со други, а не кога сме поделени“,
вели Ахмети.
Смета дека идејата за прв премиер Албанец е добра порака и за регионот и за меѓународната заедница – дека интересите на оваа држава заедно со Македонците ги штитат и Албанците, како два најголеми етникума.
„Ова е придобивката на сите и на државата, но ние не се разочаруваме од овие изјави или изјаснувања, но ги сигнализираме да бидат внимателни затоа што ваквите изјави се опасни, независно од тоа дали тие навистина мислат така. Некој може да рече дека е кампања, но јас не можам да ги проголтам толку лесно, затоа што ме изненадуваат дури и овие нашите, дека ова ДУИ наводно го користи за да го подобри имиџот, ДУИ нема зошто да го подобри имиџот, нема зошто да ја збогатува нејзината историја, бидејќи доколку има политичка партија со долготрајност на овие простори независно од тоа што е создадена на почетокот на 21 век тоа е ДУИ“,
вели Ахмети.
Додаде дека со години прави обиди да се избегне парцијализирање на Албанците во земјава во многу партии, бидејќи, како што посочи, така губат мандати, ја губат силата.
„Времето покажа дека моите грижи беа исправни, пред четири години од 29 мандати колку што имаа Албанците во Собранието на Македонија, паднаа на 20 мандати и со тоа не ги изгуби ДУИ изборите, туку Албанците изгубија девет мандати“,
вели Ахмети.