Билатералните односи меѓу С Македонија и Албанија од страна на двајцата соговорници биле оценети како традиционално добри, кои придонесуваат за продлабочување на соработката. Бил нагласен фактот дека меѓу двете земји нема отворени спорови, па оттука и императивот соработката да продолжи на сите полиња
Состојбата на северот на Косово и непосредната потреба од постигнување на мировен договор со взаемно признавање меѓу Србија и Косово, со цел стабилност на Балканот, била една од темите на која денеска разговарале лидерот на ДУИ, Али Ахмети и претседателот на Албанија, Бајрам Бегај, соопштија од партијата.
На средбата со албанскиот претседател, Ахмети, како што информираат од ДУИ, бил придружуван од првиот вицепремиер, Артан Груби, генералниот секретар на партијата, Фатон Ахмети и шефот на пратеничката група и потпретседател на ДУИ, Арбр Адеми.
Билатералните односи меѓу С Македонија и Албанија од страна на двајцата соговорници биле оценети како традиционално добри, кои придонесуваат за продлабочување на соработката. Бил нагласен фактот дека меѓу двете земји нема отворени спорови, па оттука и императивот соработката да продолжи на сите полиња.
„На средбата беше истакната досегашната висока соработка, поддршката и посветеноста во процесот на евроинтеграциите како земји кои чекорат по истиот пат. На оваа средба се разговараше за состојбата на северот на Косово и непосредната потреба од постигнување мировен договор со взаемно признавање меѓу двете земји со цел стабилност на Балканот“,
се наведува во соопштението од ДУИ за средбата.
Ахмети, како што се додава, го информирал претседателот Бегај за ратификацијата на Договорот меѓу двете влади за воспоставување заеднички гранични премини според концептот на заеднички гранични проверки „Едношалтерски систем“, нагласувајќи дека овој проект мора брзо да започне со реализација, за забрзување и поедноставување на движење на луѓето и стоките.
На средбата станало збор и за важни проекти како што е Коридорот 8, кој е опишан како патен и железнички јазол кој започнува од пристаништата во Бугарија, поминува низ Северна Македонија и Република Албанија и завршува во Бриндизи, Италија.
„Ахмети и Бегај истовремено го поздравија вклучувањето на овој проект во главната европска TEN-T мрежа, бидејќи истиот отвора нови можности за финансирање на нови железници, пристаништа и патишта“,
се нагласува во соопштението.
Во контекст на разговорот за проектите меѓу двете земји, било истакнато дека пристаништето Драч и сувото пристаниште во Струга, што е дел од Договорот за соработка меѓу двете влади за развој на инфраструктурни проекти, логистичка безбедност и ефикасност на транспортот на стоки, е инвестиција која претставува иновативна и модерна димензија и ги надминува димензиите на национален проект за развој на Западен Балкан.
Лидерот на ДУИ, Али Ахмети, заедно со претседателот на Алијанса за Албанците, Арбен Таравари, првиот човек на Алтернатива, Африм Гаши и лидерот на Демократската партија на Албанците (ДПА), Мендух Тачи, вчера присуствуваа на состанок со премиерот на Албанија, кој беше опишан како неформална средба во форма на вечера.
Единствено лидерот на Беса, Билал Касами, кој исто така, беше поканет на средбата, ја одби поканата и не дојде во Тирана, оти, како што изјави претходно, не сакал да седне на иста маса со Ахмети.
Албанската „Њуз 24“ вчера доцна вечерта јави дека на состанокот станало збор за внатрешно-политичката ситуација во С Македонија, како и за улогата на албанските партии во надминувањето на ќорсокакот за обезбедување мнозинство во Собранието за уставните измени поврзани со напредокот и продолжувањето на процесот на евроинтеграции на земјава.