Лидерот на ДУИ вели дека дискутирале и со ВМРО ДПМНЕ и со СДСМ дека во вистинскиот момент кога ќе има 80 гласа, ,,овој проблем може и да се поправи”
Лидерот на ДУИ, Али Ахмети,по маратонскиот состанок на претседателството на партијата, од новинарите беше прашан дали ќе има средба со политичките партии на Албанците во врска со измените на Уставот и евентуална замена на формулацијата за јазик што го зборуваат најмалку дваесет отсто од граѓаните со албански јазик.Тој рече дека состаноци од таков карактер се добри и дека се во постојана комуникација со сите политички партии, како и со меѓународната заедница.
Според Ахмети, ова е историски момент и за државата и историски момент за сограѓаните Македонци бидејќи, како што кажа, ќе бидат легитимирани меѓународно како нација.
„Тоа е историски момент за нашата земја, тоа е историски момент за нашите македонски сограѓани, тие да бидат легитимирани меѓународно како нација, како идентитет, како култура и ако успееме да изменаџираме со успех и да се разбереме и да го разбереме историскиот момент, нашите сограѓани, политичките партии што ги претставуват нашите сограѓани, навистина, би било извонредно достигнување за заедницата и нашите македонски сограѓани, затоа што тие, конечно, ќе се легитимират и никогаш нема да бидат оспорени како заедница. Така како што успеавме и сме биле дел од придонесот да се признае македонската црква, како што сме биле соработници да ги затвориме споровите со грчката страна, така ќе бидеме соработници и помошници за успешно затворање и на прашањата со бугарската страна“,
рече Ахмети.
Дефиницијата „дваесет отсто“, според Ахмети, е компромис што е направен во 2001 година со цел да не и се наштети на супстанцијата на мировниот Охридски договор. Ахмети додаде дека дискутирале и со ВМРО ДПМНЕ и со СДСМ дека во вистинскиот момент кога ќе има 80 гласа, ,,овој проблем може и да се поправи”.