„Ние сме во тесна соработка со Вашингтон, секојдневно комуницираме и мислам дека Нефју е еден добар сојузник и промотор на сите овие процеси за борба против корупцијата која сметам дека и за вас е едно од најважните прашања“, изјави Агелер одговарајќи на новинарско прашања
Координаторот за антикорупција на американскиот Стејт департмент, Ричард Нефју, кој е во посета на земјава, не е тука да ги соопшти имињата на лицата од „црната листа“ на САД, туку е тука за да се дискутираат процесите, санкциите и протоколите што САД ги имаат во однос на прашањата поврзани со борбата против корупцијата.
Ова денеска го изјави американската амбасадорка Анџела Агелер, која заедно со министерката за одбрана присуствуваа на вежбата со хеликоптерите „блекхок“ на армијата на САД на Криволак.
Таа посочи дека денеска присуствувала на средбата на Нефју со претседателот на државата Стево Пендаровски и изрази задоволство што координаторот за антикорупција на американскиот Стејт департмент одвоил време да ја посети земјава.
„Јас бев утрово на средбата со претседателот Пендаровски и мило што успеа да го вметне овој планиран состанок во неговата агенда. Тој не е тука да открива имиња од `црната листа` ниту нешто слично, туку е тука да се дискутираат процесите, санкциите, протоколите што Владата на САД ги има по ова прашање со корупцијата. Ние сме во тесна соработка со Вашингтон, секојдневно комуницираме и мислам дека Нефју е еден добар сојузник и промотор на сите овие процеси за борба против корупцијата која што сметам дека и за вас е едно од најважните прашања“,
изјави Агелер, одговарајќи на новинарско прашања.
Во врска со нејзината изјава од завчера дека во наредните месеци ќе има едно или две лица што ќе се најдат на листата на санкции, Агелер рече дека стои зад кажаното, но посочи дека информациите треба да дојдат од Вашингтон.
„Јас не можам да дадам ниту временски рокови ниту број на лица кои би биле откриени. Постојат повеќе листи и постојат повеќе различни механизми во рамките на кои лицата за кои се верува дека се поврзани со корупција можат да бидат истражувани и санкционирани преку нашите (на САД) правни процеси на санкции“,
посочи американската амбасадорка.
Шефот на државата Пендаровски на денешната средба со Нефју ја истакнал подготвеноста на Северна Македонија да ја продолжи соработката со Соединетите Американски Држави во напорите за сузбивање на корупцијата со цел унапредување на демократијата и владеењето на правото, соопштија од неговиот кабинет.
Оттаму информираа дека за време на средбата, Пендаровски истакнал оти борбата против криминалот и корупцијата, вклучувајќи ја високата корупција, е од исклучително значење во напорите за градење на правната држава и за стекнување на доверба на граѓаните во институциите. Дополнително, претседателот истакнал дека земјава високо ја цени помошта и поддршката од САД во нејзините напори во борбата против корупцијата и изразил очекување оти таа ќе продолжи и натаму.