Родителите што се залагаат за онлајн-настава и оние што бараат децата да се вратат во школските клупи денеска имаа одделни средби во Владата каде што се сретнаа техничкиот премиер Оливер Спасовски, заменик-министерката задолжена за координација со економските ресори Мила Царовска, министерот за образование и наука Арбер Адеми, министерот за здравство Венко Филипче и заменичката министерка за образование и наука Елизабета Наумовска.
Од Владата во соопштение до јавноста информираат дека родителите биле запознаени дека моделот за организирање и спроведување на наставата за учебната 2020/2021 година во услови на пандемијата со ковид-19 предвидува комбинирана настава со одредени исклучоци кои одат во прилог и на застапниците на онлајн-наставата и на оние што се залагаат за настава со физичко присуство.
„Задолжителното физичко присуство на учениците од прво до трето одделение опфаќа и исклучоци за оние ученици за кои родителите ќе наведат прифатливи причини за нивните деца да биде организирана наставата со алатки за интернет комуникација, односно онлајн. Вториот исклучок од задолжителната онлајн-настава за учениците од четврто одделение во основното образование и за учениците до четврта година во средното, овозможува настава со физичко присуство само во оние училишта во кои бројката на ученици по паралелка не надминува 20, каде што е можно остварување на вториот услов за физичка дистанца од 1,5 метар меѓу учениците, и со обезбедени санитарно-хигиенски услови за одржување на општа и лична хигиена наведени во протоколите“,
се вели во владиното соопштение.
За овие исклучоци ќе одлучува работна група составена од претставници на Министерството за образование и наука, на Министерството за здравство и на канцеларијата на претседателот на Владата, по претходно добиено позитивно мислење од Комисијата за заразни болести при Министерството за здравство.
Од Владата велат дека овој комбиниран модел е прифатен како модел кој во најголема мерка ги намалува ризиците за здравјето на учениците и наставниците и истовремено обезбедува спроведување на наставно-образовните програми.