Конечната одлука за начинот на кој ќе се спроведува наставата од септември ќе биде донесена врз основа на мислењето на Комисијата за заразни болести, информираат од Владата по денешната седница.
„Владата на Република Северна Македонија ја разгледа и усвои Информација со План за одржување на наставата во училиштата во учебната 2020/2021 година на Министерството за образование и наука, и донесе заклучок таа да биде споделена со Комисијата за заразни болести, по што врз основа на мислењето на Комисијата ќе биде донесена одлука за моделот за организирање и спроведување на наставниот процес во основните и средните училишта.
се вели во владиното соопштение.
Министерот за здравство Венко Филипче истакна дека ставот на Комисијата е наставата да се одржува онлајн, освен за првачињата за кои смета дека е неоходно физичко присуство.
Комисијата за заразни болести и претставници од Министерството за образование денеска требаше да продолжат со состанокот кој започна вчера, но, сепак, се пролонгира за утре. Првично, начинот на кој ќе треба да се реализира наставата и преку какви модели беше најавено дека ќе се соопштат до 10 август, но конечна одлука се уште нема.