Без разлика што на протестот повика СДСМ, партискиот лидер вели дека ваквите протести се за мобилизирање на граѓаните и искажување на гневот кој го чувствуваат поради непостапувањето на институциите, а не за собирање политички поени. Филипче ги повика граѓаните да се вклучат на протестот и да не го гледаат како протест на СДСМ, а најмалку, како што рече, како негова или желба на партијата со ова да добијат политички поени.
Лидерот на опозицискиот СДСМ, Венко Филипче, изјави дека протестот кој партијата го најави за утре во Охрид, по случајот со претепаната охриѓанка, ќе се одржи и покрај барањата на семејството на девојката случајот да не се политизира. Тој во вечерашното интервју за Топ тема на телевизија Телма ги повика граѓаните да не го гледаат утрешниот протест како партиски бидејќи тој, како што кажа, најмалку е за собирање на политички поени.

„Апсолутно ќе го одржиме протестот. Го прочитав апелот на семејството на Сара дека не сакаат тој да се одржи, но сакам да кажам дека ова не е само за Сара. Ова е да не се случат и други Сари. Тоа е целта на нашиот протест – да се подигне свеста и конечно институциите да го направат она што треба, и да си ја вршат работата“,
изјави Филипче.
Без разлика што на протестот повика СДСМ, тој вели дека ваквите протести се за мобилизирање на граѓаните и искажување на гневот кој го чувствуваат поради непостапувањето на институциите, а не за собирање политички поени. Филипче ги повика граѓаните да се вклучат на протестот и да не го гледаат како протест на СДСМ, а најмалку, како што рече, како негова или желба на партијата со ова да добијат политички поени.
На новинарска забелешка дека протестот е реакција на конкретен настан, лидерот на СДСМ рече дека партијата секогаш реагирала на вакви настани и забележа дека и покрај тоа, институциите повторно не ја вршат работата.
„Секогаш сме реагирале, вратете се наназад. Немало настан за кој не сме изреагирале. Што е тоа што треба да се случи за институциите конечно да работат како што треба? Што е тоа што треба да биде доволно голем скандал, престап или трагедија во нашето општество за институциите да работат. Погледнете го министерот Панче Тошковски – со што сè се занимава, само со тоа не се занимава додека жени се самоубиваат со деца, се убивани и се случуваат случаи како вчерашниов, во кој, замислете, МВР и обвинителството го пуштило момчето дома. Како резултат на нашиот и притисокот на јавноста веројатно ќе бидат преземени соодветни мерки“,
вели Филипче.
Претседателот на СДСМ ја прокоментира и изјавата што денеска од Брисел ја даде премиерот Христијан Мицкоски, кој најави дека ќе биде направено сè за сторителот да биде изведен пред лицето на правдата.
„Го видовме и премиерот како се вклучи во темата од Брисел. Зарем има подобар показател од тоа дека тој директно се меша во работата на судството и обвинителството? Тоа значи дека некој повторно го повикал на телефон за тие да си ја вршат работата. Ништо друго не функционира, вклучително и МВР“,
рече Филипче.
Претходно денеска, семејството на младата Сара од Охрид повика случајот да не се политизира. Порачаа дека нивната борба нема никаква политичка заднина, ниту пак сакаат трагедијата на нивната ќерка да биде искористена за политички цели.
