Владата ја усвои информацијата за барање итно мислење од Венецијанската комисија за моделот според кој писмениот дел од правосудниот испит би се полагал на јазикот на студирање, а усниот на македонски
Од движењето ЗНАМ велат дека е несоодветно претставниците на Влен да создаваат политичка еуфорија и да прогласуваат историски победи во врска со предложениот модел за полагање на правосудниот испит, пред да биде добиено мислењето на Венецијанската комисија.
Владата на денешната седница ја усвои информацијата за потребата од прибавување итно стручно мислење од Венецијанската комисија за предложениот модел, кој предвидува писмениот дел од правосудниот испит да се полага на јазикот на кој кандидатот го завршил високото образование, а усниот дел на македонски јазик.
Од ЗНАМ посочуваат дека усвојувањето на информацијата не значи дека е донесена конечна одлука ниту дека се направени промени во законската рамка и начинот на функционирање на правосудниот систем.
„Усвојувањето информација за потребата од стручно мислење не значи дека е донесена конечна одлука ниту дека е направена каква било промена во законската рамка и начинот на функционирање на правосудниот систем“,
се вели во соопштението.
Според партијата, мислењето на Венецијанската комисија треба да обезбеди стручна и правна основа за понатамошното постапување, во согласност со Уставот, законите, правната сигурност и европските стандарди.
Оттаму оценуваат дека прашањата поврзани со употребата на јазиците, особено во правосудството, се премногу сериозни за да бидат предмет на дневнополитички маркетинг пред да бидат разгледани сите правни аспекти и да се добијат релевантните стручни мислења.
„Наместо предвремено прогласување победи и создавање очекувања кај граѓаните, потребни се одговорност, институционален пристап и почитување на правните процедури“,
велат од ЗНАМ.
Од партијата додаваат дека владеењето на правото, уставноста и еднаквоста пред законите се темелни принципи врз кои треба да функционира државата и не смеат да бидат предмет на политички пазарења.
Темата за начинот на полагање на правосудниот испит доби нови димензии во политичкиот дискурс во државата, откако лидерот на ЗНАМ и градоначалник на Куманово, Максим Димитриевски, во телевизиско гостување во петокот (6 ноември) кажа дека неговата партија ќе ја напушти Владата доколку се прифати правосудниот испит да се полага на друг јазик освен македонскиот и дека ставовите на ЗНАМ по ова прашање му се познати на премиерот Христијан Мицкоски.
Димитриевски најави дека на следниот состанок со премиерот ќе побара лидерска средба на која отворено би се разговарало и би се дефинирале црвените линии со коалициските партнери во однос на ова прашање и што тоа ќе значи за иднината на државата и за целокупниот правосуден систем.
Изјавата на Димитриевски го наметна прашањето за стабилноста на владината коалиција. Од опозицискиот СДСМ, во овој контекст, оценија дека темата со правосудниот испит се турка за да се создаде впечаток за наводен судир и тензија во владејачката коалиција, што би му дало алиби на премиерот и лидер на ВМРО-ДПМНЕ, Христијан Мицкоски, за предвремени парламентарни избори и истовремено да се избегне одговорност за случајот со Алта банка и празната државна каса.
Инаку, решението што се предлага е усниот дел од правосудниот испит да се полага на македонски јазик, а писмениот на јазикот на кој се студира.
Премиерот Христијан Мицкоски, вчера одговарајќи на новинарско прашање дали на владина седница ќе се разгледува прашањето за полагање на правосудниот испит на албански јазик, како и на реакциите на коалицискиот партнер ЗНАМ, кажа дека нема да има барање и решение со кое испитот ќе се полага на албански јазик, туку решението што ќе биде доставено до Владата содржи два дела.
„Првиот ќе им овозможи на кандидатите делот поврзан со нивните додипломски студии да го полагаат на јазикот на кој го завршиле високото образование, доколку студирале на јазик различен од македонскиот, како што се албанскиот, турскиот или англискиот. Вториот дел, кој опфаќа симулација на судски процес од кривична или граѓанска постапка, ќе се полага на македонски јазик“,
рече Мицкоски при посетата на Охрид.