За случајот се осомничени раководителот на Секторот за „Е-индекс“ на Унивезитетот и референтка за студентски прашања на еден од факултетите при УГД, која вчера не беше спомената во информациите на МВР во врска активностите што се преземаа
Материјалната корист со која се стекнале двајцата осомничени од незаконските активности, според Обвинителството се проценува на 21 000 евра
Основното јавно обвинителство Штип поведе постапка во врска со злоупотребите во информатичкиот систем на Универзитетот „Гоце Делчев“ (УГД), каде за финансиски надомест биле менувани, бришени и прикривани податоци за оценки и испитни бодови во базата за електронски индекс.
За случајот се осомничени две лица – раководителот на Секторот за „Е-индекс“ на Унивезитетот и референтка за студенстски прашања на еден од факултетите при УГД, која вчера не беше спомената во информациите на МВР во врска активностите што се преземаа.
Како што соопштија денеска од Јавното обвинителство на Република Северна Македонија, тие се осомничени дека како соизвршители ги стотриле кривичните дела злоупотреба на службената положба и овластување до член 353 став 4 во врска со став 1 и компјутерска измама според член 251-б став 2 во врска со став 1 од Кривичниот законик (КЗ).
Надлежен јавен обвинител до судија на претходна постапка доставил предлог на двајцата осомничени да им биде одредена мерка притвор,
Според Обвинителството, тие во својство на службени лица – вработени во Универзитетот „Гоце Делчев” – Штип ја искористиле службената положба, со што прибавиле за себе поголема материјална корист.
Имено, според описот, тие ги извршиле кривичните дела за кои се товарат во периодот од 2021 до 2026 година. Пречекорувајќи ги границите на своите службени должности и овластувања, референтката за студентски прашања на еден од факултетите, која е второосомничена, по добиени насоки од првоосомничениот раководител на Секторот за ,,Е-Индекс”, внесувала во информатичкиот систем на Универзитетот невистинити податоци.
Материјалната корист со која се стекнале двајцата осомничени од незаконските активности, според Обвинителството се проценува на 21 000 евра.
„Со незаконити дејствија на менување, бришење или прикривање на податоците во базата за електронски индекс пријавените предизвикувале невистинити резултати при електронската обработка и преносот на податоците, а за сметка на тоа се стекнувале со материјална корист која во моментов се проценува на 2 000 евра“,
се наведува во соопштението од републичкото Јавно обвинителство.
Министерката за образование и наука Весна Јаневска прашана денеска за коментар на случајот изјави дека секогаш ќе има поединци што ќе го злоупотребуваат системот, но она што е важно е дека Министерството за внатрешни работи (МВР) си ја работи работата, односно случајот е откриен и се води истрага.
Таа рече дека ги охрабрува студентите, вработените на универзитетите и факултетите и сите граѓани да пријавуваат вакви нелегални активности.
„Системите на факултетите се електронски, меѓутоа секогаш има човек што работи на тој систем. Секогаш може да се случи незаконско дејство, но важно е дека ние сме успеале тоа да го откриеме. Важно е да го спречиме и да им пратиме порака на другите кои би помислиле дека може такво нешто да направат, да се откажат од тоа. Не е прв случај во кој имаме пријави. Секаде каде што сме имале пријави, ДПИ (Државниот просветен инспекторат) постапува и имаме и неколку случаи за кои се водат судски постапки, ќе видиме како ќе завршат. Овде ДПИ нема зошто да постапува, полицијата постапува“,
изјави Јаневска по промоцијата на Националната стратегија за безбедност на сообраќајот на патиштата 2026–2030.
Министерот за внатрешни работи Панче Тошковски потврди дека МВР и повеќе негови сектори вчера презеле акција по индиции за прекршување на законот од страна на вработен на Универзитетот во Штип. Тој денеска говореше за едно лице, кое, како што кажа, незаконски вршело корекција на оценки на студенти на Универзитетот. Во рамките на акцијата, рече ресорниот министер, биле пронајдени и одредени докази, кои, како што додаде, се надева дека во преостанатиот дел од процесот ќе ја докажат теоријата на случајот.
Полициски службеници од Одделот за криминалистичка полиција, СВР Штип, СВР Скопје и Секторот за компјутерски криминал при МВР, по судска наредба обезбедена од Основното јавно обвинителство Штип, вчера вршеа претреси на повеќе локации во Штип и во Скопје во врска со случајот.
Според информациите што ги објавија дел од медиумите, повикувајќи се на извори од истрагата, злоупотребите наводно биле пријавени од турски студенти, како што беше случај и пред неколку месеци, кога професорка на УГД беше фатена со обележани пари за студент од Турција да добие предона оценка.
Во врска со случајот вчера се огласија од Универзитетот „Гоце Делчев“ – Штип, од каде што соопштија дека Ректоратот има „нулта толеранција за корупцијата и злоупотребата во академската заедница“ и оти овозможува „целосна, неограничена соработка со МВР и со надлежното обвинителство за брзо и целосно расчистување на случајот“.