Утринските извештаи на медиумските куќи „Кан“ и „Канал 13“, кои ги ажурираа своите излезни анкети, покажуваат дека има израмнет резултат меѓу блоковите, со по 51 пратеничко место, додека „Канал 12“ му додели 52 места на блокот на Нетанјаху, а 49 на блокот на Ајзенкот
Излезните анкети покажуваат дека нема јасен победник на клучните општи избори во Израел, при што ниту долгогодишниот премиер Бенјамин Нетанјаху, ниту поранешниот воен началник Гади Ајзенкот, не се на пат да обезбедат мнозинство, пишува Би-би-си.
Две израелски медиумски куќи на кои се повикуваат од телевизијата, процениле дека партијата Јашар на Ајзенкот и три други еврејски опозициски партии од неговиот „Блок за промени“ би освоиле 51 пратеничко место во Кнесетот, кој брои 120 пратеници. Исто толку места им се предвидуваат и на партијата Ликуд на Нетанјаху и нејзините сојузници – екстремно десничарски и ултраортодоксни еврејски партии. Според анкетата на трета медиумска куќа, Нетанјаху има предност од три пратенички места.
Според Би-би-си, многу работи ќе зависат од улогата на двете арапски партии, за кои се предвидува дека ќе освојат рекордни 18 или 19 пратенички места.
Излезеноста на гласачите беше највисока во последните неколку децении. Според Централната изборна комисија, таа изнесувала 77,7 отсто во моментот на затворање на избирачките места во 22 часот по локално време – што е највисоко ниво во тој час уште од 1999 година.
Објавувањето на резултатите ќе започне во текот на ноќта, но околу 600 000 гласови дадени надвор од избирачките места – главно од припадници на војската, што претставува околу 10 проценти од вкупниот број гласови – нема да бидат целосно преброени до четврток.
Откако ќе се потврдат конечните резултати и по консултациите со сите политички фракции, претседателот на Израел ќе го покани лидерот на партијата за кој смета дека има најголеми шанси да формира владејачка коалиција – процес што може да потрае со недели. Доколку тоа не успее, на крајот ќе мора да се одржат нови избори.
Во седиштето на партијата Јашар на Ајзенкот во Тел Авив, неговите поддржувачи славеа и извикуваа „Биби, оди си дома!“. Ова се случи откако првичните излезни анкети, објавени од јавниот сервис „Кан“, како и од „Канал 12“ и „Канал 13“, покажаа дека неговиот блок би можел да стане најголемата групација во Кнесетот со 52 до 53 пратенички места, наспроти 50 места за владејачката коалиција на Нетанјаху. Ајзенкот изјави дека тие испишале историја и вети дека ќе обезбеди одлуката на народот да се преточи во ционистичка влада: стабилна и добра за сите граѓани на Израел.
Неговиот сојузник во партијата Бејахад, поранешниот премиер Јаир Лапид, изјави дека блокот на Нетанјаху претрпел „тежок пораз“.
Во седиштето на партијата Ликуд на Нетанјаху во Ерусалим – за која се предвидуваше дека ќе биде најголемата партија во парламентот – немаше знаци на предавање.
Поддржувачите таму во изјава за Би-би-си велат дека ништо не е готово додека навистина не заврши.
Сојузникот на Нетанјаху, министерот за надворешни работи Гидеон Сар, изјави дека славењето на левицата е прерано, додека министерот за национална безбедност Итамар Бен-Гвир им порача на поддржувачите на неговата крајно десничарска партија Еврејска моќ да се молат конечните резултати да доведат до целосно десничарска влада.
Подоцна, Нетанјаху се појави во седиштето на Ликуд и во својот говор изјави дека неговиот десничарски блок има големо мнозинство. Тој исто така повика на формирање на силна, десничарска национална влада.
Утринските извештаи на медиумските куќи „Кан“ и „Канал 13“, кои ги ажурираа своите излезни анкети, покажуваат дека има израмнет резултат меѓу блоковите, со по 51 пратеничко место, додека „Канал 12“ му додели 52 места на блокот на Нетанјаху, а 49 на блокот на Ајзенкот.
Се предвидуваше дека двете арапски партии – „Обединетата арапска листа“ и „Заедничката листа“ – ќе освојат неколку дополнителни места во парламентот, по, како што се известува, големата излезност меѓу израелските Арапи, кои сочинуваат околу една петтина од населението и често се опишуваат себеси како палестински граѓани на Израел.
Тие се појавуваат како клучниот фактор што ќе ја одреди власта на овие избори, но само една партија отворено поддржа соработка со нив во владата.
„Се надевам дека бројките ќе се поклопат и дека ние, ‘Блокот за промени’ и Обединетата арапска листа, ќе можеме да обезбедиме 61 место во Кнесетот“,
изјави лидерот на Обединетата арапска листа, Мансур Абас.
Вчерашните избори се први по смртоносните напади врз Израел, предводени од Хамас, на 7 октомври 2023 година, како и по војните што следеа во Газа, Либан и Иран.
Израелците, исто така, ги сметаа овие избори за едни од најсудбоносните во историјата на земјата, бидејќи од нив може да зависи не само кој ќе ја предводи државата, туку и дали таа ќе продолжи по својот сегашен пат на тврда линија и верски национализам.