Црна Гора е на добар пат наскоро да ѝ се приклучи на ЕУ, а останатите треба да го следат тој пример, порача германскиот канцелар
Германскиот канцелар Фридрих Мерц изјави дека е сигурен оти преостанатите прашања меѓу Подгорица и Загреб можат да се решат и дека нема да претставуваат пречка за членството на Црна Гора во ЕУ, пренесува „Вијести“.
На прес-конференцијата во Свети Стефан (Црна Гора) по самитот на Берлинскиот процес, тој рече дека минатата недела во Брисел разговарале на таа тема.
„Разговарав со хрватскиот премиер. Имавме интензивни разговори на таа тема. Сигурен сум дека преостанатите прашања можат да се решат и дека нема да претставуваат пречка за членството на Црна Гора во ЕУ“,
рече Мерц, одговарајќи на новинарско прашање дали отворените прашања со Хрватска можат да го забават патот на Црна Гора кон ЕУ.
Тој рече и дека во Црна Гора се донесени конкретни одлуки за да се отвори патот за тие разговори.
Владата на Црна Гора во понеделникот, врз основа на претходно обезбедена согласност од мнозинството членови, усвои одлуки со кои се менува името на градскиот базен во Котор и дополнително се одобрува спомен-плочата поставена во Морињ во октомври 2022 година. Тоа беа две од осумте барања на Хрватска, кои Загреб неодамна им ги достави на останатите членки на ЕУ.
Преостанатите шест прашања се однесуваат на утврдување на судбината на исчезнатите лица од воениот период, обесштетување на поранешните затвореници во логорот Морињ, кривично гонење на одговорните за воени злосторства, решавање на имотноправните барања на хрватските семејства, утврдување на морската граница меѓу двете држави и враќање на школскиот брод „Јадран“, кој е предмет на долгогодишен спор меѓу Подгорица и Загреб.
Одговарајќи на прашање за пристапувањето на државите според принципот „чекор по чекор“ (постепена интеграција) и кои држави би можеле на тој начин да ѝ се приклучат на Унијата, Мерц рече дека и на денешниот состанок разговарале за одделни држави од Западен Балкан и дека е очигледно оти во некои од нив „растат тензиите“.
„Во последните неколку недели видовме некои настани со кои се долева масло на огнот“,
наведе тој.
Мерц потсети дека тој и францускиот претседател Емануел Макрон го предложиле принципот „чекор по чекор“ за пристапување, кој подразбира привремена фаза во која државата сè уште не е членка, но може да учествува во одделни области.
„Минатата недела зборувавме за тоа на состанокот на Европскиот совет и добивме позитивна реакција и поддршка од Западен Балкан“, рече Мерц.
Тој истакна дека на земји како Црна Гора може да им се понуди и конкретна европска перспектива, односно уверување дека ќе стане 28. членка во 2028 година.
„Верувам дека тоа е реално“, порача тој.
Мерц рече дека земјите од Западен Балкан ѝ припаѓаат на Европа – и географски и политички.
„Долго време ова беше само фраза што се користеше во раскошно срочени говори. Меѓутоа, во последните месеци конечно успеавме да оствариме конкретен напредок“,
додаде Мерц.
Според него, Црна Гора е на добар пат наскоро да ѝ се приклучи на ЕУ, а останатите треба да го следат тој пример.
Мерц рече дека сакаат да го задржат постојниот замав на проширувањето на ЕУ.
„ЕУ мора да расте ако сака да го зајакне својот суверенитет во денешниот свет и да биде препознаена како самостојна глобална сила. Истовремено, мора да биде јасно дека политичката волја мора да произлезе од самиот регион. А реформите, особено оние што се однесуваат на владеењето на правото, се неопходен предуслов за секој напредок“,
порача Мерц.
Тој рече дека Берлинскиот процес, во целина, дава опипливи резултати – особено во создавањето перспективи за младите генерации, поврзувањето на индустриските зони, интеграцијата на телекомуникацискиот сектор, подобрувањето на условите за инвестирање и поддршката на стартап-компаниите.