Претреси наводно се вршат на повеќе од десет локации во Скопје, Тетово и во Гевгелија, а меѓу осомничените, неофицијално, има и вработени во Царинската управа
На повеќе локации во Скопје, Тетово и Гевгелија во тек е голема полициска акција, во рамки на истрага против криминална група осомничена за шверц и нелегална трговија со лекови, медикаменти и додатоци во исхраната, пренесоа повеќе медиуми, повикувајќи се на првични неофицијални информации.
Според досегашните сознанија, осомничените се товарат и за други коруптивни дела, а досега во акцијата се приведени шест лица, додека во меѓувреме полицијата трага по уште неколкумина за кои постојат сомневања дека биле дел од криминалната група.
Претреси наводно се вршат на повеќе од десет локации во Скопје, Тетово и во Гевгелија, а меѓу осомничените, неофицијално, има и вработени во Царинската управа.
Акцијата, велат неофицијалните информации, ја спроведува Одделот за сузбивање организиран криминал при Бирото за јавна безбедност (БЈБ) во рамките на Министерството за внатрешни работи.
Истрагата, како што објавија дел од медиумите, ги товари осомничените за повеќе кривични дела, како криумчарење, повреда на права од индустриска сопственост, давање и примање поткуп и перење пари и други приноси од казниво дело.
Од Министерството за внатрешни работи (МВР) за „360 степени“ потврдија дека денеска во утринските часови започнала полициска акција под раководство на јавен обвинител од Основното јавно обвинителство за гонење организиран криминал и корупција. Како што велат официјално од МВР, акцијата е насочена кон сузбивање криминална група инволвирана во криумчарење стоки и извршување коруптивни кривични дела.
Според неофицијалните иформации, акцијата сè уште е во тек, а повеќе детали од надлежните институции за вкупниот број осомничени, досега приведените, кривичноправната квалификација на делата, како и дали има пронајдени и одземени предмети во рамките на претресите, повеќе детали се очекуваат во текот на денот.