Критиките од опозицијата во врска со изградбата на дата-центрите, вели премиерот, се тотална невистина, незнаење и непознавање и доаѓаат од луѓе кои не ја сакаат Македонија и сакаат државата да стагнира
И покрај негодувањата на јавноста и критиките од опозицијата, власта не отстапува од изградбата на дата-центри во земјава. Премиерот Христијан Мицкоски вели дека Владата останува на ваквата стратегија и дека во моментов се преговара со 5 до 6 потенцијални инвеститори, од кои една е голема мултинационална компанија.
Критиките од опозицијата во врска со изградбата на дата-центрите, вели тој, се тотална невистина, незнаење и непознавање и доаѓаат од луѓе кои не ја сакаат Македонија и сакаат државата да стагнира.
„Во однос на коментарите на опозицијата, претпоставам дека кај нив работи Фројд и тие мислат дека како што тие се однесуваа кон државата и кон граѓаните, лажејќи ги, ограбувајќи ги, понижувајќи ги, така и сите се однесуваат. Ние како влада немаме намера ништо да правиме под маса. Секоја странска инвестиција или инвестиција која е стратешка ја објавуваме јавно, транспарентно и тука нема никаква дилема да има“,
изјави Мицкоски одговарајќи на новинарски прашања на настанот во Владата по повод потпишувањето на Договорот за проектирање и изградба на интерконективниот гасовод меѓу Македонија и Србија.
Ако сакаме државата да се развива, додава тој, треба да го препознаеме моментот за ова прашање.
„Замислете да не е вештачката интелигенција или податочните, односно дата-центрите, како би изгледал денеска БДП, да речеме, на САД. Зарем ‘Нвидиа’, ‘Амазон’, ‘СпејсЕкс’, ОпенАИ’ – мултинационални глобални компании чиишто брендови тежат трилиони би постоеле денеска ако на било каков начин тие го доведуваат квалитетот на животот на граѓаните под знак прашање. Зарем сите овие милијардери чиишто брендови во бизнисот тежат трилиони, ќе го жртвуваат својот бизнис, репутацијата на бизнисот, па и својот личен имиџ и репутација, ако тоа што го работат е штетно за луѓето. Овие проекти се во насока да преку гас се изградат гасни централи кои ќе произведуваат електрична енергија којашто подоцна ќе се користи во овие дата-центри“,
додаде Мицкоски.
Во однос на проектот во Пехчево, кој беше отфрлен од Советот на Општината, премиерот вели:
„Тоа е приватна иницијатива и е предлог на нацрт-урбанистички план. Тука државата нема ништо. Кога државата ќе прави или учествува за изградба на таков објект јавно и транспарентно ќе кажеме пред граѓаните.“
Лидерот на опозицискиот СДСМ, Венко Филипче, вчера обвини дека Владата тајно преговара со компанија која, како што посочи, за изградба на дата-центар во земјава веќе има обезбедено капацитет од 100 мегавати електрична енергија, како и директен пристап до реката Вардар.