„Горд сум што бев дел од владата на СДСМ, која со правилни државнички политики овозможи државата да биде дел од најмоќниот воен сојуз НАТО, што е историски успех за нашата држава“, пишува лидерот на СДСМ
Претседателот на СДСМ, Венко Филипче, преку соопштение на социјалната мрежа Фејсбук го честита 18 Август – Денот на Армијата на Република Северна Македонија изразувајќи признание за професионалноста и несебичниот ангажман на сите нејзини припадници.
Во својата објава, Филипче истакна дека Армијата претставува еден од основните столбови на националната безбедност и стабилност.
„Горд сум што бев дел од владата на СДСМ, која со правилни државнички политики овозможи државата да биде дел од најмоќниот воен сојуз НАТО, што е историски успех за нашата држава. Со членството во НАТО ја обезбедивме безбедноста и територијалниот интегритет на земјата, а нашите војници заедно со војниците на земјите-членки дејствуваат согласно стандардите на Алијансата, даваат помош на граѓаните при елементарни непогоди и учествуваат во сите меѓународни мировни мисии“,
пишува лидерот на СДСМ.
Тој додаде дека државата мора да продолжи со градење институции кои се сигурни, професионални и подготвени да одговорат на секој предизвик и да ја продолжиме борбата за европската иднина на Северна Македонија.
Со централна свеченост во Охрид денеска беше одбележан Денот на Армијата – 18 Август, а во пораките кои беа упатени од неа доминираа оние за новите безбедносни предизвици, хибридните и киберзаканите, како и потребата од современо вооружување и опрема, и придонесот на земјава во НАТО.
На овие предизвици во своето обраќање се осврна и претседателката на државата и врховна командантка на Армијата, Гордана Сиљановска-Давкова, која рече дека современата одбрана не треба да се сведува само на одговор на веќе настанатите закани, туку мора да се заснова на нивно предвидување, подготовка на соодветни капацитети и градење отпорност на државата.
Инаку, денеска на свеченоста во Охрид по повод одбележувањето на Денот на Армијата – 18 Август, министерот за одбрана Владо Мисајловски рече дека модернизацијата на Армијата се реализира согласно планираната динамика и оти во тек е набавката на различни видови опрема – артилериски системи, средства за противвоздушна одбрана, беспилотни и системи за противоклопна борба, опрема за киберзаштита, за воздухопловна поддршка и комуникациски системи.
Во касарната „Илинден“ во Скопје синоќа единицата на артилерискиот баталјон на Армијата изврши почесна артилериска стрелба со истрелување десет плотуни од шест артилериски орудија во пресрет на одбележувањето на 18 август – Денот на Армијата и 34 години од нејзиното формирање.
За роденден на Армијата е избран 18 август, денот кога во 1943 година на Славеј Планина бил формиран баталјонот „Мирче Ацев”, кој се смета за првата организирана воена формација на НОВ на Македонија. Процесот за формирање на современата македонска армија, пак, започна во 1992 година, кога тогашниот претседател Киро Глигоров, со раководството на ЈНА го потпиша договорот за дислокација на федералната армија од територијата на Република Македонија.
Македонската Армија денес е составен дел од најголемиот колективен безбедносен систем откако Република Северна Македонија во март 2020 година стана полноправна членка на НАТО.