Во обраќањето, Зеленски вели дека украинското разузнавање има докази оти Русија ќе ги искористи своите септемвриски избори за да прогласи нова мобилизација за зголемување на бројот на војници
Украинскиот претседател Володимир Зеленски вели дека доставиле предлози на американските преговарачи за план за завршување на војната со Москва и посочи дека Русија ќе ги искористи парламентарните избори следниот месец како изговор за прогласување нова мобилизација.
Најавата на Зеленски за нови предлози за мировни преговори, во голема мера запрени од почетокот на конфликтот со Иран, доаѓа во услови на сугестии и од Русија и од Украина дека американските преговарачи наскоро ќе ги посетат нивните две земји, пишува Ројтерс.
„Ги пренесовме нашите предлози на американската страна. И САД можат да помогнат во зајакнувањето на нашата одбрана, пред сè со воздушна одбрана, и да извршат притисок врз Русија за нејзините планови да бидат различни – да се подготват за завршување на војната, наместо да ја продолжуваат“,
рече Зеленски во своето вечерно видеообраќање.
Американските преговарачи Стив Виткоф и Џаред Кушнер последен пат беа во Москва во јануари, но сè уште не го посетиле Киев.
Украина постојано повикува на прекин на огнот по речиси четири и пол години борби. Русија вели дека сака решение, но секое решение мора да вклучува целосно отстапување од Украина на четири региони што ги бара Москва.
Во обраќањето, Зеленски вели дека украинското разузнавање има докази оти Русија ќе ги искористи своите септемвриски избори за да прогласи нова мобилизација за зголемување на бројот на војници.
„Тие се подготвуваат за мобилизација на есен, веднаш по парламентарните избори и тоа е дел од планот за создавање впечаток дека Русите наводно ја поддржуваат војната. Потоа, по таканаречените избори, тој планира дополнителна брза мобилизација на неколку стотици илјади Руси до крајот на годината, плус уште еден сличен број следната година“,
рече Зеленски.
Работата, рече тој, ќе биде дополнување на регрутирањето преку склучување договори со војници.