Ова е веќе друг процес на привремено затворање, процес на социјализација на учениците, во правец на постигнување поквалитетно образование, вели Јаневска
Министерката за образование и наука Весна Јаневска ја брани идејата за затворање на подрачни училишта и покрај противењата на родителите во дел од засегнатите места.
Таа вели дека има случаи на едно дете во еден клас и во едно училиште, што го смета за несоодветно. Целта е поквалитетно образование, додава таа, а растојание од, на пример, два километри, не е далечина што родителите не можат да ја совладаат. Тоа е практика во големите градови, вели Јаневска.
„Во изминатиов период, еве ќе ви кажам, во 2021 и 2022 година, 20 училишта се спонтано затворени кога јас не сум била министерка и оваа влада не управувала со земјата. И оваа година, но не само спонтано, мал дел и како процес на оптимизација, повторно околу 20 подрачни училишта ќе бидат затворени, сите оние кои имале помалку од пет ученици, но има некои кои имале 7-8 ученици. Ова е веќе друг процес на привремено затворање, процес на социјализација на учениците, во правец на постигнување поквалитетно образование. Имаме случаи на пет деца во пет различни одделенија, тоа не е образование ниту социјализација, тоа не е стимулација на знаење, не е стимулација на натпреварување во позитивни вештини, ние мора да си ги спасиме децата првенствено од тоа. Мора да работат и да се среќаваат со големи групи, не смеат да живеат затворени во одредени средини“,
рече Јаневска во гостување на ТВ Сител.
Падот на бројките на ученици, министерката ги гледа во трендот на намалување на новородени, и помалку во трендот на иселување.
На новинарска констатација дека само во второто полугодие во Штип имало 60 деца помалку во однос на претходното, Јаневска кажа дека не смета дека иселувањето е зголемено, туку дека тоа оди во синусоиди – има периоди кога е зголемен трендот на иселување и обратно.
Јаневска уверува дека учениците ќе ја почнат новата учебна година со обезбедени учебници и дека најголемиот дел од нивната дистрибуција веќе е завршена.
Говорејќи за вештачката интелигенција, министерката истакна дека дебатата за нејзините придобивки и ризици се води на глобално ниво и додаде дека целта на Министерството е нејзиното воведување во образовниот процес да биде насочено кон подобрување на наставата и учењето.