Министерството за внатрешни работи (МВР) и Фондот за здравствено осигурување (ФЗОМ) вечерва заеднички соопштија дека проблемот со здравственото осигурување на вработените во МВР е надминат и дека тие повторно можат непречено да ги користат здравствените услуги
„Во текот на денот двете институции беа во континуирана координација и во соработка со Управата за јавни приходи, ги презедоа потребните активности за утврдување и отстранување на причините што доведоа до привремен прекин во остварувањето на правата од здравственото осигурување“,
се вели во заедничкото соопштение.
Сега, велат оттаму, овозможено е непречено користење на правата од здравственото осигурување за вработените во Министерството за внатрешни работи.
„МВР и Фондот за здравствено осигурување ќе продолжат со координирани активности за изнаоѓање системско решение кое ќе овозможи во иднина непречено функционирање на здравственото осигурување и навремено остварување на правата од здравственото осигурување за сите вработени“,
стои во соопштението.
Двете институции денеска меѓусебно си ја префрлаа одговорноста, за застојот во здравственото осигурување на полицијата. ФЗОМ тврдеше дека МВР не платило придонеси за работниците кои судски биле вратени на своите работни места, додека ресорното министерство се бранеше дека со платата за месец јули се платени и сите придонеси за пријавените вработени во ресорот.