Од опозициската партија обвинуваат за институционален пинг-понг со вината за отровната вода и велат дека иако министерот за здравство вчера признал вина, денеска одговорноста била префрлена на локалните власти, без притоа никој суштински да преземе одговорност
Социјалдемократскиот сојуз на Македонија (СДСМ) реагираше на изјавите на премиерот Христијан Мицкоски кој ја обвини опозицијата дека шири дезинформации и непотребна паника меѓу населението со стари извештаи за несиправност на водата.
Оттаму велат оти власта се однесува неодговорно за состојбата и оти континуирано ја манипулира јавноста бидејќи, министерот за здравство Сашо Клековски вчера признал вина, а денес одговорноста се префрла исклучиво на локално ниво, при што никој суштински не презема одговорност.
„Кога на Мицкоски и на неговата влада црвените светла и алармите им доцнат, како да веруваме дека оваа „техничка“ вода утре ќе биде безбедна дури и за капење? Како да му веруваат граѓаните на Мицкоски за водата, кога тој лажеше за сè? Лажеше дека ќе го врати името. Лажеше за Преспанскиот договор. Лажеше за НАТО. Лажеше дека се загрозени јазикот, културата и националниот идентитет. Лажеше дека ќе ги исполни реформите до 1 Јуни“,
велат од СДСМ.
Дополнително, додаваат дека од актуелната власт има само лажни најави за подобри преговарачки услови со ЕУ кои донеле само изолација, како и за тврдењата за независно правосудство кое сега е приватизирано за лични интереси, а меѓу неостварените ветувања ги вбројуваат и оние за повисоки плати, пензии и подобри услови за земјоделците. Во заклучокот, од СДСМ велат дека премиерот излажал за сè и прашуваат како сега да му веруваат за водата оние што го гласале, бидејќи во иднина како што велат, повторно ќе ја соопштат истата приказна, дека никој не е виновен, туку само алармот се активирал доцна.