Поранешниот претседател на ФФМ заложил недвижен имот, а како мерка на претпазливост одземени му е се патните документи
Судија на претходна постапка при Основниот кривичен суд Скопје ја прифати понудената гаранција од над 1,15 милиони евра, со што на поранешниот претседател на Фудбалската федерација на Македонија (ФФМ), Муамед Сејдини, му е укината мерката притвор, информираат од Кривичниот суд. Оттаму велат дека гаранцијата се состои од засновање хипотека врз недвижен имот, а како дополнителна мерка на претпазливост за обезбедување на неговото присуство на осомничениот му е одземена патната исправа.
Поранешниот прв човек на ФФМ беше во притвор од 24 април 2026 година, по предлог на скопското Обвинителство, поради опасност од бегство и можност за попречување на истрагата преку влијание врз сведоци. Откако одбраната поднела предлог за укинување на притворот со гаранција, а јавниот обвинител дал позитивно мислење, судијата го уважил предлогот.
„Судијата на претходна постапка донесе решение со кое го уважи предлогот и ја прифати понудената гаранција, а со оглед дека против решението не беше изјавена жалба, тоа стана правосилно, по што осомничениот е пуштен да се брани од слобода“,
велат од Кривичен суд.
Сејдини е осомничен за кривичното дело проневера во службата бидејќи, според наводите на Обвинителството, во периодот од ноември до декември 2024 г., како претседател на ФФМ, стекнал противправна имотна корист од 660 илјади евра за скопска компанија, а сомнежите се дека злоупотребата настанала при користење средства од програмата на УЕФА наменети за изградба на трибина на стадионот „Билјанини Извори“ во Охрид.
„Осомничениот, спротивно на одлуката на Управниот одбор, вметнал дополнителен услов во склучениот договор со избраната фирма, со кој предвидел авансна уплата во износ од 20 отсто од вкупната вредност на договорот пред почнување на градежните работи и без какво било претходно постапување од изведувачот. Притоа не предвидел никакво правно обезбедување за уплатените средства на име аванс“,
кажаа од Обвинителството.
Овој аванс бил предвиден без изведувачот воопшто да го побара тоа во понудата и без никаква гаранција за исплатените средства пред почетокот на градежните работи, по што по налог на Сејдини, на 17 декември 2024 година, спорниот аванс бил префрлен на сметката на избраното правно лице.
Вчера адвокатот на Сејдини, Шкодран Алили, во објава на социјалните мрежи напиша оти тој е пуштен од притвор и ќе се брани од слобода. Муамед Сејдини помина 92 дена зад решетки, а Алили се заблагодари до сите оние што покажале солидарност во изминатите три месеци.