„Денес е 18 јули. Пет дена, министре Клековски. Зошто пет дена ја криевте оваа информација од јавноста? Зошто граѓаните не беа навреме предупредени дека бројот на лица со исти симптоми постојано расте?“, прашува Петровска.
Пратеничката од СДСМ, Славјанка Петровска, побара целосно расчистување на случајот со масовните стомачни тегоби во Гостивар, оценувајќи дека јавноста предоцна била информирана за состојбата и дека институциите мора да утврдат индивидуална одговорност.
Таа наведува дека околу 1 200 жители на Гостивар, меѓу кои и деца, побарале медицинска помош, а според објавата на министерот за здравство, првите случаи биле регистрирани уште на 13 јули.
„Денес е 18 јули. Пет дена, министре Клековски. Зошто пет дена ја криевте оваа информација од јавноста? Зошто граѓаните не беа навреме предупредени дека бројот на лица со исти симптоми постојано расте?“, прашува Петровска.
Таа посочува дека Агенцијата за храна и ветеринарство веќе издала забрана за употреба на водата, а МВР истражува сомневања за неовластена интервенција во водоводниот систем.
„Конечните лабораториски резултати треба стручно да покажат дали водата ги предизвикала здравствените проблеми. Дотогаш никој не смее однапред да ја утврдува причината. Но чекањето на резултатите не смее да стане алиби за молчење и бегство од одговорност“, наведува таа.
Петровска бара истрагата да одговори кој ги поставил пумпите, кој наредил тие да бидат пуштени во употреба, кој ја одобрил интервенцијата и кој знаел за случувањата, а молчел.
Дополнително, како особено загрижувачки ги оцени информациите дека вработени од Институтот за јавно здравје, испратени по налог на јавен обвинител да земат мостри, биле попречувани во извршувањето на својата работа.
„Ако некој попречувал стручни лица испратени по налог на јавен обвинител, мора да се испита дали целта била да се одолжи или попречи обезбедувањето на доказите“, наведува Петровска, поставувајќи прашања кој ги попречувал, кој ги повикал собраните лица и дали некој се обидувал да влијае врз истрагата.
Таа ги повика Обвинителството и Министерството за внатрешни работи веднаш да ги идентификуваат сите лица кои ја попречувале екипата и да утврдат дали имало обид за влијание врз обезбедувањето на доказите.
Пратеничката побара Владата и надлежните институции јавно да ја објават целосната хронологија на настаните – кога биле информирани за првите случаи, кои мерки биле преземени, кој ја одобрил интервенцијата во водоводниот систем и каква заштита им била обезбедена на вработените и сведоците.
„До завршувањето на истрагата, сите раководни лица непосредно поврзани со интервенцијата треба да бидат отстранети од должност. Не како однапред осудени, туку за да немаат можност да влијаат врз документацијата, вработените и сведоците“, наведува Петровска.
Таа додава дека одговорноста не смее да се крие зад зборот „систем“, туку, како што вели, треба да ја сносат оние што наредувале, одобрувале, знаеле и молчеле.
„Гостиварци не бараат задоцнети соопштенија и смирувачки изјави. Бараат безбедна вода, вистина и правда. Пет дена криење се пет дена предоцна. Одговорноста има име и презиме. Институциите мора да го утврдат и јавно да го соопштат“, порачува Петровска.