Единствен извор за нови судии е Академијата за судии и јавни обвинители, која, според Камбовски, мора итно да почне со едукација на нова генерација
Судовите во земјата во првиот квартал од 2026 година работеле со вкупно 271 097 предмети, од кои 137 681 биле новопримени, а 133 416 пренесени од претходниот период. Во овие три месеци биле решени 123 809 предмети, што значи дека на крајот на кварталот останале нерешени дури 147 288 предмети
Ниската реализација на судовите во првиот квартал од годинава е резултат на големиот прилив на нови предмети и хроничниот недостиг на судии и судска администрација, рече денеска претседателот на Судскиот совет, Александар Камбовски.
На денешната седница членовите на Судскиот совет, кои го изработија кварталниот извештај, информираа дека неажурност е забележана кај речиси сите судови во државата, со исклучок на само неколку кои успеале да одржат повисоко ниво на ефикасност.
Според првиот човек на Судскиот совет, иако судовите продуцираат голем број завршени предмети, тоа не е доволно бидејќи истовремено има нови случаи кои пристигнуваат.
„Во услови кога недостигаат судии и административен кадар, крајниот резултат е таков каков што го слушнавте. Имаме реален проблем во основните судови, а кога унапредуваме судии во повисоките судови, ги празниме основните, а немаме со што да ги замениме“,
истакна Камбовски додавајќи дека проблемот е сложен и бара брза институционална реакција.
Камбовски предупреди дека проблемот веќе е изразен во основните судови. Како единствено системско решение за овој сложен проблем, тој ја посочи Академијата за судии и јавни обвинители (АСЈО), од која побара итна реакција.
Претседателот на Судскиот совет нагласи дека Академијата мора што побргу да започне со едукација на нова генерација судии.
Според извештајот, во најголемиот број судови постои значителен недостиг на судии според систематизацијата, но и недостиг на судска служба, проблем што, како што беше нагласено, се продлабочува во изминатите години и сериозно го оптоварува функционирањето на правосудниот систем.
Судовите во земјата во првиот квартал од 2026 година работеле со вкупно 271 097 предмети, од кои 137 681 биле новопримени, а 133 416 пренесени од претходниот период. Во овие три месеци биле решени 123 809 предмети, што значи дека на крајот на кварталот останале нерешени дури 147 288 предмети.
Просечното време потребно за решавање на еден предмет на ниво на сите судови изнесува 431,22 дена.
Основни судови имале најголем обем на работа, постапувајќи по 237 823 предмети. Од нив решиле 112 836, а останале нерешени 124 987 случаи. Просечното време на решавање тука изнесува 404,31 дена.
Основниот кривичен суд Скопје предводи со 46 300 предмети во работа од кои 24 164 решени и 22 136 нерешени.
Основниот граѓански суд Скопје работел со 30 723 предмети, од кои решил само 7 635, оставајќи дури 23 088 нерешени предмети.
Управниот суд работел со 7 366 предмети, решил 2 059, а нерешени останале 5 307. Просечното време за решавање изнесува 940,77 дена.
Кај Вишиот управен суд забележан е најдолгиот период за решавање на предмети меѓу сите судови – дури 1 281,95 дена. Овој суд работел со 3 515 предмети, а решил само 779.
Апелациските судови заедно работеле на 20 535 предмети, решиле 7 087, а 13 448 останале нерешени. Просечното време за решавање на предметите изнесува 692,61 дена. Најоптоварен е Апелацискиот суд Скопје со 11 538 предмети од кои 3 712 решени и 7 826 нерешени, а просечно време на решавање било 769,53 дена.
Во извештајот е наведено и дека на подрачјето на Апелацискиот суд Скопје основните судови работеле со 112 019 предмети, од кои биле решени 53 053, а нерешени останале 58 966 предмети. На подрачјето на Апелацискиот суд Битола во работа биле 52 664 предмети, од кои биле решени 18 788 предмети, а нерешени останале 33 876. На подрачјето на Апелацискиот суд Гостивар биле во работа 42 627 предмети, од кои биле решени 25 073, нерешени останале 17 554 предмети, а на подрачјето на Апелацискиот суд Штип биле во работа 30 513 предмети, од кои биле решени 15 922, нерешени останале 14 591 предмети.
Врховен суд работел со 1 858 предмети, од кои решил 1 048, а нерешени останале 810.