Спасувачите првпат воспоставиле контакт со Гил преку камера за пребарување внесена во урнатиот подрум на зградата, а акцијата за негово спасување траела повеќе од 70 часа
Четириесет и четиригодишен маж е изваден од под урнатините на паркинг на трговски центар што се урнал во катастрофалните земјотреси што ја погодија земјата пред осум дена.
Хернан Алберто Гил Флорес бил затрупан под седум метри урнатини, а акцијата за негово спасување траела повеќе од 70 часа, пишува Си-ен-ен.
Според противпожарната бригада на Чиле, Гил кој работел како обезбедувач во трговскиот центар, е во добра состојба.
„Откако го примивме Хернан во амбулантното возило, тој беше стабилен. Во текот на целото возење тој беше свесен, фокусиран и соработуваше, а сите негови витални знаци беа во нормални граници“,
вели болничар на Црвениот крст на Венецуела.
Спасувачите првпат воспоставиле контакт со Гил преку камера за пребарување внесена во урнатиот подрум на зградата.
Од противпожарната служба на Чиле велат дека ги забележале прстите на човекот како мавтаат низ мал јаз помеѓу слоевите дебел бетон.
Екипите за итни случаи велат дека комуницирале со Гил и му давале вода, храна и лекови, а течностите му биле пренесувани преку црево и шприц.
Во видеото објавено во четвртокот може да се види половината од главата и рамената на Гил како излегуваат од урнатините.
Противпожарната служба на Чиле ја опиша спасувачката операција како многу сложена бидејќи зградата била нестабилна, а тимовите морале да се справат со паѓање на остатоци.
Себастијан Мокоркер, од тимот на Обединетите нации за проценка и координација на катастрофи, за Си-ен-ен вели дека се постигнати само чудесни спасувања седум дена по земјотресот. Таканаречениот „златен прозорец“ за пронаоѓање преживеани е обично тридневен период по кој шансите за преживување без извор на вода брзо се намалуваат.
Осум дена по земјотресите, вршителката на должност претседателка на Венецуела, Делси Родригез, рече дека напорите за пребарување и спасување ќе продолжат.
Три дена спасувачи и специјалисти од околу шест земји работеа на расчистување на безбеден премин низ урнатините и обезбедување на животна поддршка за Гил.
Инаку, претседателот на Националното собрание Хорхе Родригез во средата објави дека најмалку 2 295 починале, што е зголемување за околу 350 од претходниот ден. Но, се верува дека бројката на жртви е многу поголема.