Образложувајќи ја потребата Изборниот законик да се донесе по скратена постапка, пратеникот Антонио Милошоски рече дека за измените се разговара веќе четири месеци во рамки на работната група во Министерството за правда, во која учествуваа претставници на сите партии освен СДСМ, кој почна, а потоа се повлече од работната група. Во рамки на дискусиите, додаде тој, постигнат е консензус за околу 28 препораки на ОДИХР
Со 59 гласа „за“, три „против“ и ниту еден „воздржан“, пратениците на денешната седница ја усвоија потребата измените на Изборниот законик да се носат по скратена постапка.
По гласањето, потпретседателот на Собранието, Антонио Милошоски, ги задолжи Комисијата за политички систем и односи меѓу заедниците, како матично работно тело, и Законодавно-правната комисија да заседаваат по предлог-законот за изменување и дополнување на Изборниот законик.
Предлогот до Собранието е доставен од група пратеници, и тоа Антонио Милошоски, Зеќирија Таири, Даниел Стојчевски, Блерим Беџети и Иванка Василевска.
Образложувајќи ја потребата Изборниот законик да се донесе по скратена постапка, Милошоски рече дека за измените се разговара веќе четири месеци во рамки на работната група во Министерството за правда, во која учествуваа претставници на сите партии освен СДСМ, кој почна, а потоа се повлече од работната група.
„Во рамките на овие дискусии се согласивме за околу 28 препораки на ОДИХР, кои беа консензуално прифатени. Во работната група во Министерството за правда за ниедна една тема немаше надгласување и секогаш сè одеше со усвојување на нормите или препораките на ОДИХР со консензус. Ќе имаме можност да ги дискутираме тие работи и за време на собраниската и за време на комисиската седница“,
рече Милошоски образложувајќи го предлогот.
Во однос на изборниот модел, Милошоски рече дека најголем број од политичките партии биле за една изборна единица, но две политички партии, кои не ги именува, рече дека биле за осум и за три изборни единици. Бидејќи не е постигнат консензус, додаде тој, се останува на сегашното решение со шест изборни единици.
Во однос на гласањето на дијаспората, како што кажа, постигнат е консензус, согласно практиката во Франција и Естонија, да биде овозможено електронско, безбедносно и заштитено гласање.
Пред денешното гласање во парламентот, опозициските СДСМ и Левица најавија дека ќе го блокираат носењето на Изборниот законик. Според лидерот на СДСМ, Венко Филипче, предложените измени на ИЗ содржат решенија кои се недемократски и отвораат простор за злоупотреба и контрола на изборниот процес.
Лидерот на Левица, Димитар Апасиев, пак, рече дека работната група при Министерството за правда не постигнала консензус за предложените измени на Изборниот законик, а учеството на Левица во овој процес во ниту еден случај не значи согласност со понудените решенија.