„Затоа јавно прашуваме каде во финалното барање, во моментов достапно за јавноста, се вметнати правилата што Министерството тврди дека ќе важат од 2027 година“, рекоа активистите
Со барање да се почитуваат европски еколошки стандарди кога ќе се одлучува по барањето од Цементарницата „Усје“ за обнова на А-интегрираната дозвола, денеска еколошки активисти од иницијативата „Стоп за Усје“ и граѓани протестираа пред од Собранието до Министерството за животна средина и просторно планирање (МЖСПП).
„Не за нова дозвола по стари правила“, „Здравје пред профит“, „Скопје на народот, не на индустријата“, „Правото на чист воздух е основно право“ – беа дел од пораките што беа упатени на протестот.
„Пропишани се гранични вредности само за три загадувачи и тие се идентични како и во старата дозвола, а воедно и до осумпати повисоки од постојните стандарди во ЕУ. Целосно недостигаат гранични вредности и обврски за мониторинг за едни од најопасните загадувачи – тешки метали, диоксини и фурани – кои се сериозни канцерогени супстанции“,
рекоа од „Стоп за Усје“.
Активистите додадоа дека истовремено „Усје“ бара зголемување на употребата на алтернативни горива – отпад, кои ги испуштаат токму овие материи.
„Не споменуваат ниту употреба на гас наместо отровните петрол кокс и лигнит. Затоа, јавно прашуваме каде во финалното барање, во моментов достапно за јавноста, се вметнати правилата што Министерството тврди дека ќе важат од 2027 година“,
додадоа тие.
Барањето за обнова на дозволата е поднесено и објавено на 22 мај на веб-страницата на Министерството и доставено до Општина Кисела Вода и Град Скопје, по што течеше еден месец рок за увид во барањето и поднесување забелешки на постапката за обновување на дозволата.
Министерот за животна средина и просторно планирање Мухамед Хоџа во телевизиско интервју во петокот рече дека дозволата за Цементарницата „Усје“ ќе биде обновена според новиот закон за контрола на индустриските емисии, кој треба да стапи во сила во септември следната година и предвидува построги еколошки стандарди кои ќе важат за сите оператори со А-интегрирани дозволи.
Денеска со реакција излегоа и од скопската цементарница „Титан-Усје“ од каде што рекоа дека се компанија која строго ги почитува сите обврски што произлегуваат од важечката регулатива и остануваат целосно посветени на усогласување со сите идни законски решенија што ќе стапат во сила.
Од компанијата рекоа дека со големо внимание ги следат сите законски промени и во меѓународното и домашното законодавство и континуирано инвестираат во нова технологија за да може да се приспособат на регулаторните барања. Оттаму додаваат дека во изминатите 15 години компанијата инвестирала 29 милиони евра во модернизација и заштита на животната средина.