Како што соопштуваат од Владата, ова претставува конечна судска одлука која извршната власт е должна да ја почитува во согласност со принципот на владеење на правото
Министерството за енергетика, рударство и минерални суровини денеска ја информирало Владата за пресуда на Вишиот управен суд, со која се поништува одлуката за престанок на важење на одлуката за спојување на концесиите за експлоатација на рудникот „Иловица“.
Со оваа судска одлука се враќа спојувањето на концесиите за експлоатација на минерална суровина на локалитетите во Општина Босилово и Општина Ново Село. Како што соопштуваат од Владата, ова претставува конечна судска одлука која извршната власт е должна да ја почитува во согласност со принципот на владеење на правото.
Од Владата велат дека сегашната ситуација е резултат на одлуки донесени од претходниот владин состав, а не од актуелната власт.
„Ова прашање не е резултат на одлуки донесени од актуелната Влада, туку претставува наследена правна состојба која произлегува од одлуките за спојување на концесиите донесени во јуни 2023 година, како и од последователните одлуки за нивен престанок донесени само еден месец подоцна, во јули 2023 година, по што е покрената судска постапка пред надлежните судови“,
појаснуваат од Владата.
Оттаму додаваат дека се свесни оти кај дел од граѓаните, локалното население и граѓанските организации, постојат оправдани прашања и загрижености поврзани со овој проект и уверуваат дека ќе продолжат целосно транспарентно да ги разгледуваат сите релевантни факти, стручни мислења и аргументи, во рамки на законските процедури и институционалните надлежности.
Во соопштението додава дека секое понатамошно постапување во однос на овој предмет ќе се одвива исклучиво врз основа на стручни анализи, законски процедури и институционален надзор, со целосна информираност на јавноста.
Од Владата заклучуваат дека заштитата на јавниот интерес, почитувањето на највисоките еколошки стандарди и целосната законитост на постапките остануваат нивни врвни принципи.
Првите дозволи, за проспекциски геолошки истражувања за рудникот „Иловица“ датираат од 2004 година, од тогашниот министер за економија во владата на Бучковски, Фатмир Бесими. Денеска сопственик на тие резултати и потенцијален инвеститор во рудник за злато и бакар е „Евромакс рисурсес“.
Спојувањето на концесиите „Еуромакс рисорсес“ го црпи од членот 61 од Законот за минерални суровини бидејќи двете локации каде што се предвидени рудниците, практично се преклопуват.
Во 2012 година е добиена првата концесија за експлоатација на минерални суровини, но во 2016 година тогашната влада не дава и дозвола за ископ. Во 2015 г., пак, е добиена втората концесија за експлоатација на минерални суровини.
Во 2016 година „Еуромакс“ побара спојување на двете концесии, по што Министерството за економија даде позитивен одговор, но Владата не донесе одлука. Наместо тоа, Владата во 2019 година носи нова одлука за еднострано раскинување на договорот за една од концесиите. „Еуромакс“ тужи и го добива случајот пред Управниот суд, по што лиценцата им е вратена и на маса повторно се враќа спојувањето на концесиите.
На 27 јуни 2023 година Владата одобри спојување на двете концесии, но по само еден месец ја поништи одлуката.