Од коалицијата посочуваат дека во координација со лицата со попреченост, до Владата се поднесени барања кои, меѓу другото, вклучуваат итно враќање на работното време за лична асистенција на 80 часа за лицата со попреченост, редовна, навремена и непрекината исплата на надоместоците за лична асистенција, како и отстранување на административните бариери и ограничувања што влијаат врз ангажирањето на лични асистенти
Со месеци и години, децата и лицата со попреченост се соочуваат со неизвесност во врска со остварувањето на правата загарантирани со закон – велат од коалицијата „Менуваме“ во најавата за протестот што ќе го одржат во четврток (25 јуни) во 17:30 часот пред Министерството за социјална политика, демографија и млади.
Од протестот, кој ќе се одржи под слоганот за „За достоинствен живот“, лицата со попреченост ќе побараат почитување на законски гарантираните права, еднакви можности, самостоен живот и социјална инклузија.
„Намалувањето на часовите за лична асистенција, нередовните исплати на паричните надоместоци, доцнењата во финансиската поддршка, нерешените законски измени и недостатокот на ефикасно спроведување на политиките поврзани со попреченоста директно влијаат на секојдневниот живот на илјадници граѓани. Ова не се само административни прашања – тие се прашања за достоинство, еднаквост и основни човекови права“,
велат од коалицијата „Менуваме“.
Оттаму додаваат дека во координација со лицата со попреченост, коалицијата до Владата поднесува барања кои, меѓу другото, вклучуваат итно враќање на работното време за лична асистенција на 80 часа за лицата со попреченост, редовна, навремена и непрекината исплата на надоместоците за лична асистенција, како и отстранување на административните бариери и ограничувања што влијаат врз ангажирањето на лични асистенти.
Се бара и усвојување на сеопфатен Закон за лична асистенција, подготвен во консултација со заедницата на лицата со попреченост, усвојување и спроведување на Закон за регистар на деца и лица со попреченост, како и целосно спроведување на Националната стратегија за правата на лицата со попреченост 2026–2034.
Дел од барањата се и:
- Итна исплата на сите неплатени парични надоместоци и надоместоци за детска социјална заштита за мај 2026;
- Итно поднесување и усвојување на измени и дополнувања на законодавството за детска социјална цивилна заштита, во согласност со амандманот усвоен од парламентот во септември 2025 година, со кој се обезбедува зголемена финансиска поддршка за децата и лицата со попреченост;
- Реформа и реорганизација на Координативното тело на Владата за лица со попреченост, со обезбедување значајно учество и лидерство од страна на лицата со попреченост, вклучително и назначување на лице со попреченост за негов претседател и
- Сеопфатни реформи на системот за проценка на МКФ, со гарантирање на фер, транспарентни и процедури за проценка засновани на права.
Од коалицијата „Менуваме“ оценуваат дека едно општество се мери според тоа како се однесува кон своите најранливи членови, а оти правата на лицата со попреченост се човекови права и не можат да се одложуваат.