Според информациите што ги пренесува „Гардијан“, 11 лица имаат многу сериозни повреди, 22 се со помалку сериозни, додека уште 56 лица имале полесни повреди и им била укажана помош на местото на настанот или биле однесени во болница
Еден машиновозач загина, а 89 лица се повредени во тешка железничка несреќа што се случи во областа Бедфорд, Англија, откако два патнички воза директно се судрија, соопшти Британската транспортна полиција.
Се додава дека службите за итни случаи, вклучително и медицински хеликоптери, работат на терен за да им укажат помош на настраданите.
Според информациите што ги пренесува „Гардијан“, 11 лица имаат многу сериозни повреди, 22 се со помалку сериозни, додека уште 56 лица имале полесни повреди и им била укажана помош на местото на настанот или биле однесени во болница.
Полицијата соопшти дека полицајците биле на местото на настанот, работејќи заедно со полицијата на Бедфордшир и локалните противпожарни, спасувачки и итни служби.
Заменик-началникот на полицијата, Стјуарт Канди, изјави дека имало итен одговор од службите.
„Работиме брзо за да утврдиме точно што се случило и ќе дадеме дополнителни информации штом ќе можеме“,
вели Канди.
Противпожарните и спасувачки служби на Бедфордшир се на местото на несреќата јужно од Бедфорд, а службата ги замоли луѓето да ја избегнуваат областа.
Во несреќата учествувале два воза на компанијата „Источен Мидлендс“, кои сообраќале на релациите од Корби до Сент Панкрас и од Нотингем до Сент Панкрас. Судирот се случил јужно од раскрсницата Елстоу. Поради силината на ударот и огромниот број настрадани, железничкиот сообраќај кон Лондон Сент Панкрас е во целосен прекин, а на локалното население му е упатен апел да не ги посетуваат ургентните центри во болниците освен во случаи на крајна потреба.