Првите симптоми се појавиле уште за време на престојот, на 24 мај, со треска, болки во мускулите и зглобовите и лесно покачена телесна температура. Четири дена подоцна кај пациентот се појавил и ситен, густ исип
Во земјава регистриран е првиот случај на зика вирусна инфекција, потврдуваат од Институтот за јавно здравје (ИЈЗ). Станува збор за внесен случај кај пациент кој неодамна престојувал на егзотична туристичка дестинација.
Наодот е потврден на 17 јуни 2026 година од страна на Одделението за вирусологија при ИЈЗ, по што Одделот за епидемиологија веднаш стапил во контакт со пациентот и ги презел сите пропишани заштитни протоколи.
Според епидемиолошката анкета, заболеното лице во периодот од 20 до 28 мај годинава престојувало на Малдивите, каде што било каснато од комарец. Првите симптоми се појавиле уште за време на престојот, на 24 мај, со треска, болки во мускулите и зглобовите и лесно покачена телесна температура. Четири дена подоцна кај пациентот се појавил и ситен, густ исип.
Веднаш по враќањето во земјава, лицето се јавило на преглед на Клиниката за инфективни болести и фебрилни состојби (КИБФС), каде што првично се појавило сомневање за денга грозница. По детални микробиолошки испитувања во ИЈЗ за три тропски вируси, добиен е позитивен серолошки и молекуларен наод за зика. Пациентот не бил хоспитализиран, туку веднаш е испратен на домашно лекување и во моментов се наоѓа во добра општа здравствена состојба.
Иако овој случај е внесен од странство, здравствените власти предупредуваат дека поради интензивниот меѓународен транспорт и сè почестите патувања на наши граѓани во тропски предели како Малдиви, Тајланд, Индонезија, Бразил, Кариби, постои реална можност за појава на нови импортирани случаи. Како дополнителен фактор на ризик се наведува и широката распространетост на азискиот тигрест комарец во Европа, кој е потенцијален пренесувач на овој вирус.
Со цел спречување на какво било ширење, ИЈЗ и надлежните служби ги презеле потребните мерки.
„Изготвена е епидемиолошка анкета за заболеното лице, поднесена е пријава за изолиран докажан причинител на заразна болест, спроведена е итна дезинсекција во околината на местото каде што живее заболеното лице и даден е совет за превенција од сексуална трансмисија на болеста“,
велат од ИЈЗ.