„Инаку, во делот на јавувањето на премиерот, не знам колку тоа е надлежност на премиерот – да се јави кај јавниот обвинител, меѓутоа како и секој што има право да ми се јави, ми се јавил и премиерот, односно претседателот на Владата, и тука нема ништо спорно“, изјави денеска државниот јавен обвинител
Државниот јавен обвинител Ненад Савески вели дека останува на ставот да не коментира политички изјави, а во врска со телефонската комуникација од страна на премиерот смета дека нема ништо спорно и оти тоа не ја загрозува самостојноста и независноста на Јавното обвинителство.
Савески, веќе го кажа својот став по ова прашање што предизвика рекации во јавноста, како и самиот повод за телефонскиот повик на премиерот до Савески – запирањето на истрагата за случајот „Мазут“ од страна на Основното јавно обвинителство за гонење организиран криминал и корупција.
Сепак, повиците и прозивките кои доаѓаат од извршната власт кон Јавното обвинителство и одредени обвинители и понатаму ја држат темата високо во јавниот дискурс, особено откако премиерот на брифинг со новинарите во понеделникот изјави дека доколку е потребно, повторно ќе му се јави на државниот јавен обвинител.
„Не знам што е чудно што јас сум се слушнал со јавниот обвинител, не можам јас да разберам. Друго се судии, судската власт е сосема самостојна. Јавниот обвинител го избираме и предлагаме ние, како влада, и не знам што е проблематично ако јас разговарам со јавниот обвинител. Еве, конкретно ќе ви кажам – разговарав и го прашав до каде се сите овие дела и ми рече дека 80 проценти од предметите што не биле распределени, ги распределил. Тоа значи предистрага, истрага сега ќе има, тоа значи процеси. Не гледам зошто од тоа се направи врева. Сум разговарал со јавниот обвинител? Ќе разговарам и во иднина, тоа ми е работа мене, да го прашувам што е, како е, до каде е. Го предложила владата што јас ја водам, го избрале пратеничките групи од парламентот од владината коалиција, логично е да барам отчет“,
рече Мицкоски на брифингот, пренесоа дел од медиумите.
Прашан за став во врска со ваквите наводи на премиерот, Савески рече дека не знае колку е во надлежност на премиерот, покрај останатото, да се јавува и кај јавниот обвинител, но, како што додаде, секој има право да му се јави и тука нема ништо спорно.
Савески, кој на позицијата државен јавен обвинител дојде од судија во Основниот кривичен суд Скопје, рече дека впечатокот што го има во изминатиот период е дека обвинителите го даваат својот максимум во секој предмет, па и предметите кои се од интерес на јавноста.
„Сè уште стојам на ставот дека нема да коментирам изјави на политичари, вклучително и функционери, или конкретно претседателот на Владата. Меѓутоа, како што кажав и претходно, секој има право да ги изнесува своите ставови, а ние имаме обврска да ги исполниме очекувањата и да дадеме резултати, што е сосема природно. Инаку во делот на јавувањето на премиерот, не знам колку тоа е надлежност на премиерот – да се јави кај јавниот обвинител, меѓутоа како и секој што има право да ми се јави, ми се јавил и премиерот, односно претседателот на Владата, и тука нема ништо спорно“,
рече Савески по денешната седница на Советот на јавните обвинители.
Говорејќи во таа насока, тој кажа дека секогаш се залагал за комуникација меѓу институциите, оти смета дека тоа е неопходно доколку се сака да се постигнат резултати.
„А за да се остварат резултати потребно е да се овозможат и услови. Во голем дел, односно во делот на овозможување услови за работа на јавните обвинители токму таква задача и улога има извршната власт“,
додаде тој.
Одговарајќи на дополнително прашање дали смета дека со јавувањето за конкретен предмет од страна на премиерот не се нарушува независноста и самостојноста на Јавното обвинителство, Савески беше дециден дека тоа не може да биде случај бидејќи работата на институцијата со која раководи е дефинирана со Устав и со закони.
Во таа насока, тој упати и апел до јавните обвинители да не дозволуваат, одредени активности, дејствија и изјави да се одразуваат во нивното секојдневно постапување и одлучување.
„Самостојноста е неспорна и е предвидена и во Уставот и во матичните закони по кои постапува Јавното обвинителство. Така што, било каква реакција не можам да ја сметам како влијание врз мене при носењето одлуки или постапувањето“,
изјави државниот јавен обвинител.
За потсетување, телефонскиот повик на премиерот до јавниот обвинител уследи откако Основното јавно обвинителство за гонење организиран криминал (ОЈО ГОКК) соопшти дека ја запрело истрагата за предметот „Мазут“ поради немање докази за покренување обвинение кое би резултирало со осудителна пресуда.
Државниот обвинител Савески минатата недела на брифинг со новинарите неколкупати напомена дека одлуката за запирање на истрагата за случајот не е конечна. Тој рече дека, принципиелно, стои зад одлуката на обвинителката од ОЈО ГОКК која ја запре истражната постапка за случајот „Мазут“ поради немање докази.
На брифингот тој соопшти дека тече рокот од 30 дена од приемот на приговорот од државните „Електрани на Северна Македонија“ (ЕСМ), во кој Вишото јавно обвинителство Скопје ќе треба да се произнесе, по што ќе се знае дали истрагата за случајот за набавката на мазут ќе се реотвори или предметот ќе остане затворен.
Приговорот на ЕСМ се падна кај обвинителот Јован Цветановски од Вишото јавно обвинителство Скопје, кој во изјава за телевизијата Телма, минатата недела, рече дека интезивно работи на предметот, кој е прилично обемен.
Станува збор за истрага за набавките на мазут која траеше повеќе од една година, сè до моментот кога на 12 мај надлежната обвинителка Катерина Коларевиќ одлучи да ја затвори. Осомничени се 13 лица, меѓу кои бизнисмените Ратко Капушевски, Асмир Јахоски и Ерџан Сулкоски, ексдиректорот на ЕСМ, Васко Ковачевски, и други, за злоупотреба на службената положба и перење пари.