Во однос на тоа кога може да се очекува владината реконструкција, што изминатите месеци ја најавуваше, Мицкоски рече дека од следната недела ќе почнат разговорите со коалициските партнери со кои прво ќе треба да се види дали имаат поклопување на визиите
Владејачката ВМРО-ДПМНЕ е подготвена да оди на предвремени извори доколку опозицијата го бара тоа, најави денеска премиерот Христијан Мицкоски.
Мицкоски, одговарајќи на новинарски прашања, рече дека како партија претпочитаат да има редовни парламентарни избори во 2028 година, но оти секогаш се подготвени да излезат на терен и да победат.
„Факт е дека ние влегуваме во втората половина од мандатот и политички умно е кога ќе влезете во втората половина од мандатот да бидете подготвени на секакви сценарија. Ние сме кажале дека наша опција која ја преферираме како влада е редовни избори во 2028 година, но сме подготвени секогаш како политичка партија, доколку тоа опозицијата го бара, да излеземе на терен и повторно да победиме“,
рече Мицкоски.
Во однос на тоа кога може да се очекува владината реконструкција, што изминатите месеци ја најавуваше, Мицкоски рече дека од следната недела ќе почнат разговорите со коалициските партнери со кои прво ќе треба да се види дали имаат поклопување на визиите.
„Од следната недела со коалициските партнери ги започнуваме разговорите. Најпрво сакам да ја слушнам и визијата, да видиме дали таа визија се поклопува, па дури потоа може да зборуваме за кадровски решенија“,
додаде Мицкоски.
Еден од копретседателите на Влен, која е владин коалициски партнер, Биљал Касами, во интервју за „360 степени“ рече дека новоформираната партија е подготвена за ротација на ресори во владината реконструкција и оти за тоа го известиле премиерот. Касами рече дека владиното мнозинство е сериозно и нема некој сериозен проблем.
Инаку, премиерот и минатиот месец најави дека набргу ќе има избори, но оти тоа нема да биде оваа година, која ја оцени како реформска и година за консолидација.
Тогашните најави на Мицкоски за избори од лидерот на СДСМ, Венко Филипче, беа оценети како логични оти државата снемува пари и е јасно дека со методите на владеење на актуелната власт не може долго да се функционира.
Филипче тогаш рече дека СДСМ е подготвена за избори кога и да се случат, за да „стават крај на оваа власт“.