„Поставени се сигурносни појаси и предупредувачки ленти со цел заштита на граѓаните и безбедно движење во непосредна близина на оштетениот простор. Општина Центар нема да толерира несовесно и неодговорно постапување од страна на инвеститори, особено кога се загрозува безбедноста на граѓаните и се оштетува јавниот простор. За секое прекршување ќе следуваат ригорозни мерки согласно законските надлежности. Истовремено, инвеститорот е задолжен итно да го обезбеди просторот, да преземе мерки за заштита и санација и обезбедување на безбедноста на граѓаните “, се вели во соопштението од Општината
Општина Центар попладнево соопшти дека нејзините инспекциски служби заедно со екипа на Министерството за внатрешни работи излегле на терен во врска со инцидентот на булеварот „Митрополит Теодосиј Гологанов“, во близина на Католичката црква, каде настана свлечиште на земја на градилиште при што се оштетени дел од околната инфраструктура и автомобил што бил паркиран во непосредба близина.
Од Општината велат дека по извршениот увид било констатирано оштетување на коловозот, тротоарската површина, канализациската мрежа и уличното осветлување. Веднаш, како што се наведува во соопштението што го пренесува МИА, биле изречени казни и санкции за инвеститорот поради непочитѕвање на обврските и предизвикување штета врз јавната инфраструктура.
Истовремено со инспекцискиот надзор, екипи на Општина Центар излегле на терен и презеле мерки за обезбедување на локацијата.
„Поставени се сигурносни појаси и предупредувачки ленти со цел заштита на граѓаните и безбедно движење во непосредна близина на оштетениот простор. Општина Центар нема да толерира несовесно и неодговорно постапување од страна на инвеститори, особено кога се загрозува безбедноста на граѓаните и се оштетува јавниот простор. За секое прекршување ќе следуваат ригорозни мерки согласно законските надлежности“,
наведуваат од Општината.
Истовремено, инвеститорот бил задолжен итно да го обезбеди просторот, да преземе мерки за заштита и санација и обезбедување на безбедноста на граѓаните, се додава во соопштението.
Во инцидентот, кој го потврди и Министерството за внатрешни работи (МВР), бил затрупан и багерот кој работел на градилиштето, а работникот кој управувало со него, за среќа навреме успеал да излезе од него.
Според МВР, настанот се случил на улицата „Христо Смирненски“, при ископ на дипка за изградба на зграда. Како што соопштија оттаму, во инцидентот биле оштетени делови од тротоарот и улицата, а паднала и бандера врз возило кое било паркирано во непосредна близина.
Инаку, првично за свлечиштето на земја на градилиштето, преку објава на Фејсбук алармираше здружението „Во одбрана на Буњаковец“ од каде споделија и видео од инцидентот. Според групата, свлечиштето настанало на градилиште на спојот на улицата „Христо Смирненски“ и булеварот „Митрополит Теодосиј Гологанов“, каде како што наведуваат се работело за време на државен празник.
Од Здружението упатија апел до Инспекторатот на Општина Центар, Општина Ценатр – Скопје, како и до градоначалникот на Општината, Горан Герасимовски и градоначалникот на Скопје, Орце Ѓорѓиевски, да постапат итно и координирано за заштита на јавниот простор и безбедноста на граѓаните.
За потсетување, на 24 април годинава, еден работник загина, а тројца беа повредени откако беа затрупани при ископ на градилиште во скопската општина Кисела Вода. Еден од работниците беше извлечен мртов, а другите тројца со повредени беа пренесени во Ургентниот центар при комплексот клинки „Мајка Тереза“.