Српскиот претседател, Александар Вучиќ, вечерва во интервју за РТС, изјави дека со 99,99 отсто сигурност може да се потврди дека станува збор за телото на убиениот Александар Нешовиќ, но, како што кажа, не може да каже оти тој бил ликвидиран во присуство на уапсениот шеф на белградската полиција, Веселин Милиќ, кој се наоѓа во притвор
Вишото јавно обвинителство во Белград денеска соопшти дека во околината на општина Инџија во метално буре е пронајдено тело на маж за кое се верува дека е на лице кое е убиено, за што во рамките на истрагата неодамна беше уапсен и началникот на белградската полиција, пренесува регионалниот сервис на Радио Слободна Европа (РСЕ).
„Во буре, кое беше ископано на таритиоријата на општина Инџија, е пронајдено тело за кое се верува дека ѝ припаѓа на жртвата А.Н., п која се трагаше“,
изјавија од Обвинителството.
Српскиот претседател, Александар Вучиќ, вечерва во интервју за РТС, изјави дека со 99,99 отсто сигурност може да се потврди дека станува збор за телото на убиениот Александар Нешовиќ.
Тој додаде дека оваа проценка се базира на облеката што ја носела жртвата, но дека за конечна потврда се чекаат резулатите од ДНК-анализата.
Од Вишото јавно обвинителство во Белград претходно соопштија дека е издадена наредба за обдукција телото во Институтот за судска медицина во Белград, како и ДНК експертиза. Оттаму информираа дека во рамките на истрагата се издадени вкупно 70 наредби за различни вештачења и дека се запленети поголем број предмети – мобилни телефони, возила, компјутери и хард-дискови.
Истрагата се води против 10 лица кои се осомничени дека извршиле повеќе кривични дела поврзани со убиството на Нешовиќ.
Во рамките на истрагата, на 15 мај беше уапсен началникот на белградската полиција Веселин Милиќ, кој е осомничен за прикривање на злосторството.
Од Обвинителството деновиве изјавија дека Милиќ бил во ресторанот во друштво на други двајца осомничени, и дека го повикал Нешовиќ и му предложил да дојде за да разговараат.
Исто така, беше објавено дека Милиќ ѝ предложил на жртвата да не доаѓа во придружба на неговото обезбедување.
Началникот на белградската полиција Веселин Милиќ беше разрешен по апсењето на 15 мај, а судот му одреди 30-дневен притвор, поради опасност од уништување и фалсификување докази и влијание врз сведоци.
Милиќ беше началник на белградската полиција два мандата, а му беше и советник на претседателот на Србија, кој му додели медал за храброст во 2021 година.
Вучиќ во вечерашното интервју за Радио-телевизија Србија (РТС) изјави дека не може да потврди дека Нешовиќ е убиен во присуство и соучество на поранешниот началник на белградската полиција Милиќ, но порача дека ќе се справат со валканите полицајци што е можно поскоро.
„Сето ова што го видовме е застрашувачко и сакам да ги пофалам членовите на сите полициски единици кои бараа во тешки услови“,
рече тој, пренесе Нова.рс.
Вучиќ рече дека „ова го направиле чудовишта, а не луѓе“, бидејќи убиениот не бил ниту академик ниту некој без досие, но начинот на кој починал бил застрашувачки.
„Нашата реакција на ова ќе биде најжестока и ќе им го покажеме на сите чесното лице на полицијата, и да, на онаа што ги чува тајкуните. Ова се злосторници пар екселанс“,
повтори српскиот претседател, нарекувајќи го лицето кое го извршило убиството монструм и наведувајќи дека станува збор за лице кое ја напуштило полицијата пред 20 години.