Двете лица биле делумно потопени во вода, а поради можни повреди, особено кај жената за која постоело сомнение дека има скршеници, спасувачкиот тим постапувал внимателно и успеал да ја извлече, користејќи скала како импровизирана носилка
Патрола на силите на Европската Унија во Босна и Херцеговина (ЕУФОР), составена од припадници на армиите на Северна Македонија и Турција, завчера попладне спасила две лица од возило што излетало од патот Грачаница – Тузла, соопштија од Европската мисија во БиХ.
Несреќата се случила околу 14 часот, кога возило „фолксваген голф“ изгубило контрола меѓу 24. и 25. километар од патниот правец, излетало од коловозот и удрило во дрвја во близина на провалија. Возилото завршило во дијагонална положба, а двете лица во него останале делумно потопени во вода.
„Припадниците на патролата на ЕУФОР брзо реагираа на местото на настанот. Двете лица се обидуваа да се извлечат, стравувајќи дека возилото може дополнително да пролизга или да се преврти. Група цивили, исто така, реагираше, обидувајќи се да го стабилизира возилото држејќи го за тркалата за да спречи натамошно движење“,
се наведува во соопштението.
Поради можни повреди, особено кај жената за која постоело сомнение дека има скршеници, спасувачкиот тим постапувал внимателно. Користејќи скала како импровизирана носилка, тие ја извлекле жената, недозволувајќи да дојде до дополнителни повреди.
Од ЕУФОР посочуваат дека остануваат посветени на безбедноста на сите граѓани на патиштата и ја поздравуваат брзата реакција и тимската работа на припадниците ангажирани во спасувачката операција.