Во пораката од 1 052 збора, што ја објави весникот „Њујорк пост“, Ален ги изложил своите „правила на дејствување“, наведувајќи дека негова должност е да ги таргетира функционерите на актуелната администрација на САД
Американските федерални истражители испитуваат евентуален антагонизам кон претседателот на Соединетите Американски Држави (САД) како мотив на напаѓачот кој викендот пукаше на гала-вечерата на дописниците од Белата куќа, на која беа присутни американскиот претседател и високи членови на неговата администрација, пишуваат светските медиуми.
Триесет и едногодишниот Кол Томас Ален, осомничен за нападот, според медиумите наводно испратил долга порака во форма на манифест до своето семејство само десет минути пред да влезе во хотелот „Хилтон“ во Вашингтон и да отвори оган. Во пораката од 1 052 збора, што ја објави весникот „Њујорк пост“, Ален ги изложил своите „правила на дејствување“, наведувајќи дека негова должност е да ги таргетира функционерите на актуелната администрација на САД.
Официјални претставници на истражните власти изјавија дека цел на напаѓачот најверојатно биле претседателот Доналд Трамп и други високи функционери на неговата администрација.
„Врз основа на тоа што го имаме како прелиминарни информации за случувањата, веруваме дека цел на осомничениот биле членови на администрацијата“,
изјави вршителот на должноста државен обвинител на САД, Тод Бланш, во телевизиско интервју, пренесува „Гардијан“.
Осомничениот, кој се наоѓа во притвор откако беше совладан од припадниците на полицијата додека се движел низ хотелот, денеска треба да биде изведен пред федерален суд. Тој се соочува со обвиненија за напад врз федерален службеник, пукање од огнено оружје и обид за убиство на федерален службеник. Но, како што наведе Бланш, во зависност од тоа како ќе се одвива истрагата, тој може да биде обвинет и за обид за атентат врз Трамп.
Во наводниот манифест, што „Њујорк пост“ го објави во целост, и кој, според наводите, истражителите го проучуваат, осомничениот Ален составил список на лица кои му биле цел, рангирајќи ги од највисок до најнизок приоритет.
Според манифестот, претставниците на администрацијата на американскиот претседател биле на врвот на списокот.
Функционер запознаен со ова прашање за „Гардијан“ изјавил дека манифестот објавен од Њујорк пост“ е автентичен.
Претставници на Белата куќа за новинската агенција Асошиејтед прес (АП) изјавиле дека осомничениот напаѓач испратил писма до членовите на неговото семејство десет минути пред да почне со пукањето, во кое ги навел своите негативни ставови кон администрацијата на Трамп.
Според изворите, роднина, за кој тие рекле дека е брат на Ален, контактирал со полицијата во градот Њу Лондон во сојузната држава Конектикат.
Инаку, официјални службени лица изјавија дека осомничениот пукал со пушка кон агент на Тајната служба на безбедносен контролен пункт во хотелот „Вашингтон Хилтон“ пред да биде совладан и уапсен од безбедносните служби.
Американскиот претседател Доналд Трамп, неговата сопруга Меланија Трамп, потпретседателот на САД, Џеј-Ди Венс, и претставници на кабинетот беа брзо евакуирани од хотелот додека се одвивал инцидентот. Како што изјави Трамп по инцидентот, агентот на тајната служба кој бил застрелан од напаѓачот, помина без сериозни повреди, бидејќи куршумот завршил во неговиот заштитен елек.
Асошиејтед прес (АП) во своите извештаи за инцидентот објави дека напаѓачот себеси се нарекол пријателски федерален убиец, што се совпаѓа со текстот на манифестот објавен од „Њујорк пост“.
Од полициската станица во Њу Лондон, во изјава за АП, рекле дека во 22:49 часот, според локално време, околу два часа по пукањето, биле контактирани од лице кое кажало оти сака да сподели информации поврзани со инцидентот. Надлежните во полициската станица веднаш ги известиле федералните органи во врска со повикот.
Бројни други американски медиуми, исто така, објавија изјави од неименувани службеници кои навеле дека наводните писма на осомничениот Ален содржат анти-Трамп наратив, што се совпаѓа со содржината на манифестот објавен од „Њујорк пост“.
„Вашингтон пост“, исто така, објави дека осомничениот испратил писма до своето семејство, што е во корелација со тврдењата на Трамп за Фокс њуз дека член на семејството на Ален, негов брат или сестра, контактирал со полицијата.
Инаку, манифестот објавен од „Њујорк пост“ започнува со извинување на осомничениот до оние што го познаваат и продолжува со наведување на неговите мотиви за пукањето. Во него се вели цел на напаѓачот биле членови на администрацијата на Трамп, со исклучок на директорот на Федералното истражно биро (ФБИ), Кеш Пател.
Во манифестот, исто така, се наведува дека агентите на Тајната служба ќе бидат цели само доколку тоа е потребно. За хотелското обезбедување, полицијата и за Националната гарда, се наведува дека не се класифицирани како цели, доколку тоа е можно, односно дека осомничениот нема да ги таргетира освен ако тие не пукаат во него. Вработените и гостите во хотелот, исто така, не биле наведени како цели на напаѓачот.
„Јас сум граѓанин на Соединетите Американски Држави. Она што го прават моите претставници се одразува на мене. И веќе не можам да дозволам педофил, силувач и предавник да ми премачкува рацете со своите злосторства“,
се наведува во наводниот манифест на осомничениот Ален.
Во писмата тој додава:
„Вртењето на другиот образ кога ‘некој друг’ е угнетен не е христијанско однесување; тоа е соучество во злосторствата на угнетувачот“.
Иако во манифестот осомничениот не го споменува Доналд Трамп експлицитно, со име и со презиме, сепак тој алудира на низа административни активности и неодамнешни настани, вклучувајќи ги и американските напади врз бродови за шверц на дрога во источниот Пацифик.
„Се разбеснувам размислувајќи за сè што прави оваа администрација“,
навел осомничениот во манифестот.
Во интервју за емисијата „Шеесет минути во недела“ (60 Minutes on Sunday), Трамп го опиша напаѓачот како „болна личност“ и ја обвини новинарката Нора О’Донел дека е срамно да се читаат делови од манифестот во етерот.
Инаку, во останатиот дел од разговорот, претседателот Трамп ги опишува настаните од саботата вечерта со мирен тон, велејќи дека не се чувствувал особено вознемирен додека тие се одвивале.
„Не бев загрижен… Го разбирам животот. Живееме во луд свет“,
рече Трамп во интервјуто одговарајќи на прашањето дали бил загрижен од можни повреди откако ги слушнал истрелите.
Инаку, според досегашната истрага, се смета дека Ален патувал со воз од Калифорнија до Чикаго, а потоа до Вашингтон, каде што се пријавил како гостин во хотелот неколку дена пред одржувањето на гала-вечерата.
Како што пренесува „Гардијан“, федерални агенти ја испрашале сестрата на Ален во Мериленд, која им рекла на истражителите дека нејзиниот брат легално купил неколку оружја од продавница за оружје во Калифорнија и ги складирал во домот на нивните родители во Торанс без нивно знаење.