Пет приведени возачи не поседувале возачка дозвола, додека пак другите пет биле уапсени поради возење под дејство на алкохол
Во текот на изминатото деноноќие полициските службеници на територијата на целата држава спроведоа засилени контроли во кои беа лишени од слобода вкупно 10 возачи поради безобѕирно управување со моторно возило, информираат од Министерството за внатрешни работи.
Оттаму велат оти половина, односно пет од приведените возачи воопшто не поседувале возачка дозвола, а вакви прекршоци биле констатирани кај две лица во Кичево, како и кај по едно лице во Битола, Штип и во Гостиварскиот Регион. Другите пет санкционирани лица биле лишени од слобода поради возење под дејство на алкохол. Полицијата регистрирала по еден пијан возач во Скопје, Кочани, Неготино, Делчево и во Радовиш.
Од Министерството за внатрешни работи децидно најавуваат дека по целосното расчистување и документирање на сите овие десет случаи против сторителите ќе бидат поднесени соодветни кривични пријави.
Надлежните институции уште еднаш упатуваат остар апел до сите учесници во сообраќајот строго да ги почитуваат правилата и прописите. Оттаму потсетуваат дека управувањето возило без положен возачки испит, за време на активна забрана за возење или под дејство на алкохол е крајно неодговорно и ги повикуваат граѓаните заеднички да придонесат за побезбедни патишта.