Во реакцијата на ДУИ се наведува дека ВЛЕН се обидуваат вината за проблемот со правосудниот испит да ја префрлат во минатото, само за да го сокријат сопственото „предавање“ во сегашноста откако, како што велат, студентите по право ги разобличиле на протестот и откако јавноста ја видела нивната немоќ во Владата
ВРЕДИ не ги претставува Албанците, туку ги претставува оправдувањата на тие што сакаат да го потчинат албанскиот јазик, реагираат од Демократската унија за интеграција, откако од владејачката ВЛЕН обвинија дека проблемите околу неможноста да се полага правосуден испит на албански јазик се настанати поради „негрижа и политичко предавство“ од страна на ДУИ.
Во реакцијата на ДУИ се наведува дека ВЛЕН се обидуваат вината да ја префрлат во минатото, само за да го сокријат сопственото „предавање“ во сегашноста откако, како што велат, студентите по право ги разобличиле на протестот и откако јавноста ја видела нивната немоќ во Владата.
„Да разјасниме јасно – во тој закон воопшто не постои одредба за јазикот. Нема забрана за албанскиот. Нема уредување ни за македонскиот. Нема никаква јазична клаузула. Значи, свесно ја лажат јавноста. Дополнително, Законот за употреба на јазиците ова прашање јасно го уредува. Член 23, параграф 5, предвидува дека ако другите закони не се усогласат во законскиот рок, предност имаат одредбите од законот за јазиците. Тоа значи дека правната основа постои, правото постои, обврската постои. Она што не постои е политичкото достоинство на ВЛЕН“,
наведуваат од ДУИ.
Од ДУИ посочуваат и дека наместо да бараат спроведување на законот, ВЛЕН бараат оправдувања.
„Наместо да ги бранат албанските студенти, тие го бранат Министерството што им го ускратува правото. Наместо да се соочат со неправдата, тие ги напаѓаат тие што го кренаа гласот. Ова е нивното вистинско лице: албански декор во Владата, функција против албанскиот интерес. Денес не се тестираат студентите на правосудниот испит. Денес се тестира ВЛЕН. И паднаа. Паднаа на испитот за достоинство. Паднаа на испитот за претставување. Паднаа на испитот за албанскиот јазик. Тие што денес молчат кога се допира албанскиот јазик, утре ќе молчат и за секое друго право“,
додаваат од ДУИ.
Од ВЛЕН претходно обвинија дека Талат Џафери го запечатил исклучувањето на албанскиот јазик од правосудниот испит. Според нив, тој како претседател на парламентот во 2019 година не побарал усогласување на законот за правосудниот испит со одредбите за албанскиот јазик.
„Уште поразочарувачки е фактот што овој закон беше изгласан со Бадентер, односно и со гласовите на пратениците Албанци од тој состав, кои имаа национална обврска да бараат испитот да се полага и на албански јазик. Тие го изгласаа законот, оставајќи денес стотици албански студенти да ги трпат последиците од една двојна неправда“,
порачаа од ВЛЕН.