Вчера, Трамп рече дека „целата земја може да биде збришана за една ноќ, а таа ноќ може да биде утревечер“. Тој вели дека ќе ги уништи иранските електрани и инфраструктура ако Техеран одбие да се согласи пред рокот
Иран и Израел денеска разменија напади, откако Техеран одби повторно да го отвори Ормускиот Теснец и да прифати договор за прекин на огнот во пресрет на рокот поставен од американскиот претседател Доналд Трамп за да се согласи со неговите барања или да биде „збришан“, пишува Ројтерс.
Иран го отфрли американскиот предлог посредуван од Пакистан за итен прекин на огнот и укинување на неговата ефективна блокада на теснецот, по што би следеле разговори за поширок мировен договор во рок од 15 до 20 дена, се наведува во написот на агенцијата според извор запознаен со планот.
Техеран ги отфрли заканите на американскиот претседател Доналд Трамп против иранската инфраструктура како „заблуда“.
Воен портпарол на Централниот штаб на Хатам ал-Анбија, кој ја презема командата за време на војна, изјави дека заканите на Трамп вчера нема да „го надоместат срамот на Америка“.
„Грубата, арогантна реторика и неоснованите закани на заблудениот американски претседател нема да компензираат за срамот и понижувањето на Америка во регионот на Западна Азија“,
рече портпаролот во соопштението објавено од државните медиуми.
Иранскиот одговор се состоел од 10 клаузули, вклучувајќи крај на конфликтите во регионот, протокол за безбедно поминување низ Ормускиот Теснец, укинување на санкциите и реконструкција, објави официјалната новинска агенција ИРНА.
Вчера, Трамп рече дека „целата земја може да биде збришана за една ноќ, а таа ноќ може да биде утревечер“. Тој вели дека ќе ги уништи иранските електрани и инфраструктура ако Техеран одбие да се согласи пред рокот.
Без договор, Трамп рече дека „секој мост во Иран ќе биде урнат“ до полноќ по источно време и „секоја електрана во Иран ќе биде онеспособена, ќе гори, ќе експлодира и никогаш веќе нема да се користи“.
Денеска, израелската војска соопшти дека завршила бран воздушни напади насочени кон инфраструктурата на иранската влада во Техеран и други области. Употребувала системи за воздушна одбрана за пресретнување на ракети лансирани од Иран.
Израелската војска упати предупредување до граѓаните на Иран да не користат возови, велејќи дека тоа „го загрозува вашиот живот“.
„Драги граѓани, заради вашата безбедност, ве молиме од овој момент до 21 часот по иранско време, да се воздржите од користење и патување со воз низ целиот Иран. Вашето присуство во возовите и во близина на железничките линии го загрозува вашиот живот“,
се вели во објавата на Икс од израелскиот воен канал на јазикот фарси.
Трамп ги отфрли прашањата дека неговото ветување за уништување на иранските електрани би претставувало воено злосторство, велејќи дека „воопшто не е загрижен“ за таа перспектива.
„Се надевам дека нема да морам да го направам тоа“,
рече тој.
Пратеникот на Иран во Обединетите нации вчера изјави дека заканата на Трамп за напад е „директно поттикнување на тероризам и дава јасен доказ за намера за извршување воени злосторства според меѓународното право“.
„Прифаќаме крај на војната само со гаранции дека нема повторно да бидеме нападнати“,
изјави за Асошиејтед прес Моџтаба Фердуси Пур, шеф на иранската дипломатска мисија во Каиро.
Заменик-министерот за спорт на Иран, Алиреза Рахими, денеска ги повика уметниците и спортистите да формираат човечки синџири во електраните низ целата земја.