Владата ги задолжи сите институции што имаат какви било трансакции поврзани со кризата со ковид-19 редовно да ги објавуваат на страницата koronavirus.gov.mk, информираше денеска министерот задолжен за комуникации, отчетност и транспарентност Роберт Поповски.
На веб-страницата ќе бидат објавувани јавни набавки направени од институции на централно ниво кои се однесуваат на справување со кризата, податоци за финансиски и нефинансиски донации и исплати од буџетот за мерки поврзани со ковид-19.
„За да нема никаков сомнеж како се реализираат сите овие трансфери, Владата на мој предлог донесе одлука во насока на зголемување на фискалната транспарентност за да ја надгради оваа страница. Целта е јавноста да ги има на увид сите средства наменети за справување со кризата. Со поврзување на базите на институциите со електронскиот систем на јавни набавки граѓаните, медиумите и сите заинтересирани ќе можат на едно место да се информираат за сите трошења поврзани со ковид-19“,
изјави Поповски.