Потпретседателот на ДУИ вели дека не постои таен договор околу враќање на Артан Груби во земјава бидејќи нема за што да се договара, и покрај сомнежите во јавноста
Името на господинот Артан Груби се користи за да се покрие недостатокот на резултати на ВЛЕН во Владата, а јас мислам дека не постои договор за неговото враќање, вели потпретседателот на Демократската унија за интеграции (ДУИ), Арјанит Хоџа, во гостување на емисијата „360 степени“ на МРТ 1.
Во однос на тоа дали лично нему му било сомнителен фактот што Груби, по неговото доброволно предавање на граничниот премин „Блаце“, по само неколку часа притворот од затворски му беше преиначен во домашен, Хоџа вели дека иако не е правник, од неговите основни познавања на правото, за Артан Груби нема обвинение, туку предметот е во фаза на истрага и оттаму правењето јавен суд кон кого било е погрешно.
„Видете, јас не го кажувам ова за да делувам добро или недобро, но на крајот на денот и господинот Груби е татко, сопруг, син во некое семејство. И не беше во ред тоа што се претставува посебно од страна на ВЛЕН, а знам зошто го прават. Го прават бидејќи немаат резултати и сега – ајде да направиме шоу. Јас мислам дека тоа што беше став на ДУИ и став на господинот Ахмети – дека процесот треба да се остави правно, без никакво делување од било кој, да има разрешница“,
вели Хоџа.
Тој е дециден дека не постои таен договор бидејќи нема за што да се договара, и покрај сомнежите во јавноста.
Во однос на тоа што ВЛЕН го нарекува Груби „црна кутија“, алудирајќи дека тој знае многу и дека дел од договорот е да каже одредени работи за поранешни функционери од ДУИ и СДСМ пред органите на прогонот, Хоџа вели дека во редовите на ДУИ немаат стравови дека нивниот поранешен сопартиец може да однесе некој од нив во затвор.
„Апсолутно не и Ви кажувам дека сите тие тези, пуштени спинови се само фабрикувани во штабовите на ВЛЕН за да може да ја замајуваат јавноста со непостоечки теми, бегајќи од реалноста на погрешните политички одлуки што тие ги прават во владата“,
изјави Хоџа.
Прашан за ставот и односот на лидерот на ДУИ, Али Ахмети, кон Артан Груби и неговиот случај, Хоџа вели дека ставот на Ахмети е јасен, прецизен и искрен, а тоа е дека процесот кој се одвива против Груби треба да биде третиран подеднакво како и за секој друг граѓанин на земјава.
„Ако некој мисли дека господинот Ахмети делува на овој начин, мислам дека е погрешно и го омаловажува начинот на функционирање на господинот Ахмети. Господинот Ахмети има јасна слика каде сака да ја гледа државата во периодот што е пред нас. Значи, тоа е главната слика. Сè останато е простор за зборување на политичките противници“,
заклучи тој.