„Овој притисок од Иран морално и политички ќе му се удри од глава (на Техеран), и ние секако го задржуваме правото да преземеме воена акција доколку оцениме за потребно“, изјави саудискиот министер за надворешни работи, принцот Фејсал бин Фархан, на прес-конференција по состанокот со високи дипломати од регионот во Ријад
Саудиска Арабија го задржува правото да преземе воена акција против Иран, а секоја доверба во нејзиниот однос со Техеран е нарушена, изјави рано утрово саудискиот министер за надворешни работи, принцот Фејсал бин Фархан, пренесуваат светските медиуми.
Објавата доаѓа откако Ријад вчера бил цел на ирански балистички ракети.
Инаку, Иран вчера го обвини Израел дека ги нападнал неговите објекти во огромното гасно поле Јужен Парс, што се толкува како голема ескалација на американско-израелската војна што ги зголеми цените на нафтата.
По најавите дека ќе како контрамерка ќе ја нападне нафтената и гасна инфраструктура во земјите од Персискиот Залив, иранската војска, според извештаите, истрелала ракети кон Катар и Саудиска Арабија.
Во најострите коментари од кралството во Заливот по речиси три недели војна на Блискиот Исток, Фархан го обвини Иран за однапред смислени непријателски дејствија против своите соседи, што ги врши директно или преку своите регионални сојузници.
„Овој притисок од Иран морално и политички ќе му се удри од глава (на Техеран), и ние секако го задржуваме правото да преземеме воена акција доколку оцениме за потребно“,
изјави саудискиот министер за надворешни работи, принцот Фејсал бин Фархан, на прес-конференција по состанокот со високи дипломати од регионот во Ријад.
Министрите за надворешни работи од десетина земји, вклучувајќи ги Турција, Обединетите Арапски Емирати (ОАЕ), Јордан, Катар и Сирија, се собраа на консултативен состанок за војната во Иран. Како што пренесоа светските агенции, противракетен оган можел да се види во близина на хотелот во Ријад, каде што се одржуваше конференцијата.
Саудиска Арабија беше цел на напади од стотици ирански ракети и беспилотни летала од почетокот на конфликтот, а властите тврдат дека најголем дел од нив биле успешно пресретнати.
Сепак, нападите што се случија вчера беа првите во кои низ главниот град на кралството се слушнаа експлозии, а граѓаните добија известувања за воздушна опасност преку текстуални пораки.
Министерството за одбрана на Саудиска Арабија соопшти дека соборило четири балистички ракети насочени кон Ријад, а некои остатоци паднале во близина на рафинерија јужно од градот.
Саудиска Арабија и Иран ги обновија дипломатските односи во 2023 година како дел од напорите за смирување на тензиите по години непријателство поттикнато од ривалските политички и воени фракции во регионот.
Бин Фархан изјави дека Саудиска Арабија сè уште го претпочита патот на дипломатијата, но додаде дека доколку Иран не запре веднаш со напади, во тој случај речиси ништо нема да може да ја врати довербата меѓу двете земји.
Цените на нафтата на светските пазари вчера повторно скокнаа, достигнувајќи 110 американски долари за барел, а како последица на нападите врз енергетската инфраструктура на Блискиот Исток во рамките на воениот конфликт меѓу САД и Израел, од една, и Иран, од друга страна.
Американскиот претседател Доналд Трамп синоќа се закани дека „масовно ќе го разнесе“ најголемото гасно поле во светот откако израелските напади на оваа иранска локација го натераа Техеран да ги засили нападите врз енергетските објекти низ Блискиот Исток, објави „Гардијан“.
Одлуката на Израел да го таргетира гасното поле Јужен Парс означува голема ескалација на војната, зголемувајќи ги стравувањата од значително нарушување на меѓународното снабдување со енергија.
Иран веднаш возврати со нови напади низ регионот, вклучително и врз катарските објекти за течен природен гас (LNG) што го разбесни американскиот претседател, се додава во написот на британскиот медиум.
Трамп вчера на социјалните медиуми тврдеше дека САД „не знаеле ништо“ за израелскиот напад врз Јужен Парс.
Американските медиуми претходно објавија дека САД биле свесни за нападот. „Волстрит журнал“ објави, повикувајќи се на неименувани американски претставници, дека претседателот го одобрил нападот, во обид да изврши притисок врз Техеран да го деблокира Ормускиот Теснец.