Министерот Цветан Трипуновски одговори дека ресорното министерство ги следи состојбите и оти ќе бидат преземени конкретни чекори доколку има потреба
Македонските земјоделци очекуваат нов бран поскапувања на земјоделските производи поради воените конфликти на Блискиот Исток, регион од каде доаѓа најголемиот дел од ѓубривата и нафтените деривати.
Претседателот на Националната федерација на фармери Стеванче Јорданоски, пред денешното Годишно собрание на Федерацијата, изрази надеж дека ресорното Министерство навреме ќе преземе мерки и ќе се активира т.н. кризен фонд со цел да се ублажат последиците од кризата.
„Со моменталното случување во светот и војната која никој не ја посакува се случија големи турбуленции на берзите на нафта, а и сите репроматеријали и ѓубрива доаѓат од тој регион. Очекуваме големи зголемувања на цените и во малопродажба. Државата односно Министерството за земјоделство треба навреме да преземе мерки како што е активирање на т.н. кризен фонд за да излезе во пресрет при набавката на репроматеријалите односно ѓубривата“,
рече Јорданоски.
Министерот за земјоделство, шумарство и водостопанство, Цветан Трипуновски, одговори дека ресорното министерство ги следи состојбите и оти ќе бидат преземени конкретни чекори доколку има потреба.
„Она што е важно во делот на цената на ѓубривата и на нафтените деривати, е дека како Министерство ги следиме состојбите секојдневно. Ќе видиме во каков правец ќе се движат. Доколку има потреба, нормално како Министерството ќе излеземе со конкретни мерки и предлози за санација на таквата состојба“,
вели Трипуновски.
Во однос на сточарството, министерот Трипуновски не очекува проблеми со претстојниот откуп на јагнето за кое кланиците понудиле цена од 260 денари за откуп од лице место.
Очекувањата се мало покачување на цената да има во текот на следната недела, кога се очекува „пикот“ пред велигденските празници.
„Имавме серија состаноци на коишто присуствуваа здруженијата на одгледувачи на овци и кланичните капацитети. На последниот состанок, кланиците понудија цена од 260 денари за откуп на јагне од лице место, значи не донесено до кланица. Нормално, таа цена зависи од категоријата на јагнето кое се предава. Не очекувам да се случат некои поголеми проблеми. Доколку оваа цена се одржи во текот на откупот, со достигнување на шпицот што се очекува веќе наредната недела, можно е да има и мало покачување на цените. Ја следиме состојбата како Министерство и мислам дека сточарите ќе бидат задоволни“,
рече Трипуновски.
На денешното годишно собрание на Федерацијата на фармери, земјоделците како проблеми со кои се соочуваат ги посочија ниските откупни цени, недостигот на работна сила, инфраструктурата и негативните влијанија на климатските промени.
Според Јорданоски, еден од најголемите предизвици е миграцијата од руралните средини односно половина од младите и жените ги напуштаат селата, што ја нарушува демографската и економската стабилност на овие заедници.
Јорданоски вели дека без нова генерација млади земјоделци, иднината на секторот е неизвесна и затоа додава оти се потребни конкретни политики и мерки.
„Земјоделството мора да стане атрактивна професија за младите преку подобри услови за работа, финансиски стимулации, модернизација на инфраструктурата и програми за едукација и поддршка на младите и жените во руралните средини“,
кажа Јорданоски.
Најкритични сектори, според него, се полјоделството и сточарството. Вели овчарите се дефицитарен кадар и веќе не може да се најде овчар ниту за две илјади евра плата.