Денеска се закажани тестирања по два предмети поради големиот број пријавени ученици
Ученци и нивни родители претпладнево протестираа пред влезот на средното медицинско училиште „Д-р Панче Караѓозов““ во Скопје затоа што не сакаат квалификациско тестирање од кое ќе зависи кои ученици ќе бидат примени во прва година во 2020/2021 за насоката медицинска сестра на албански наставен јазик.
Во Конкурсот на МОН за оваа насока за настава на албански јазик се предвидени 102 ученика во три паралелки, а со ист број максимални 75 бодови се пријавени 166 ученици.
Тие требаше да имаат денеска тестови по предметите биологија и хемија и од успехот и резултатите да се одреди кои ученици ќе бидат примени во училиштето. Учениците и родителите со извици протестираа во училишниот двор, барајќи да се отвори уште една паралелка за да нема елиминациски тест.
Од видео-снимките што ги објави Алсат се гледа дека пред влезната врата на училиштето има голема турканица, а присутните не носат ниту маски, ниту се одржува растојание.
Директорката на училиштето Маја Салиу е недостапна за изјава за да информира дали ќе има средба со родители или дали од МОН има насоки како да се постапи. Во медицинското „Д-р Панче Караѓозов“и во минатите години имаше поголем број пријавени со успех 5.00 во основно, а и протести од родители кои не се согласуваат со дополнителни тестови.
Покрај во медицинското во Скопје, квалификациско тестирање денеска треба да има во уште две средни училишта за истата насока – медицинска сестра, но за настава на македонски јазик – во СОУ „Димитар Влахов“ во Струмица, каде што за слободни 34 места односно една паралелка се пријавени 39 ученици, и во СОУ „Ѓорче Петров“ во Прилеп, каде што за 34 места односно една паралелка конкурирале 44 ученици со максинални (75) бодови.