Министерот за информатичко општество и администрација, Дамјан Манчевски, реагираше на попладневното исклучување на ТВ-програмите во знак на протест.
Тој вели дека тие го прекршиле членот 115 од Законот за електронски комуникации, каде е предвидено дека операторите без согласност на корисниците можат да ги прекинат програмите заради реконструкција, модернизација, одржување или во случај на технички пречки во мрежата.
Со оглед на тоа што не се работи за прекин од вакви причини, посочува Манчевски, јасно е дека се работи за повреда на Законот, а последиците за ова дело се дефинирани во членовите 182 и 186 од Законот за електронски комуникации. Во тие членови на кои се повикува министерот, е предвидена глоба од 20 000 евра за операторот и 30 отсто од казната за одговорното лице во компанијата. Во членот 186, пак, е предвидено дека покрај паричната следува и прекршочна санкција забрана на вршење на определена дејност во траење од шест месеци до три месеци.
„Покрај ова, сите претплатници на операторите имаат законско право да бараат и право за надоместок на штета од страна на операторите, поради прекршување на одредбите од претплатничките договори и можат да бараат соодветна правна заштита преку Агенцијата за електронски комуникации, како надлежно регулаторно тело. Што се однесува до тоа дали е нешто уставно или не, надлежна институција е Уставниот суд“,
вели Манчевски.
Министерот во продолжение ги објавува и членовите од Законот за електронски комуникации кои гласат:
Член 115
(1) Операторите кои обезбедуваат пристап до јавна електронска комуникациска мрежа можат, без согласност на корисниците, привремено да го ограничат или прекинат пристапот до нивните услуги, доколку тоа е потребно заради реконструкција, модернизација, одржување или во случај на технички пречки или недостатоци во мрежата.
(2) Операторите се должни да ја информираат Агенцијата и да ги известат корисниците за ограничувањата или прекините кои траат подолго од 30 минути:
- најмалку 48 часа пред планираната реконструкција, модернизација или одржување или
- колку што е можно побрзо, но не подолго од 48 часа, кај ограничувањата или прекините предизвикани од технички пречки или недостатоци во мрежата.
(3) Операторите треба да ги преземат сите неопходни мерки, ограничувањата или прекините да траат што е можно пократко.
Член 182
(1) Глоба во износ од 20.000 евра во денарска противвредност ќе му се изрече за прекршок на правно лице, односно трговец поединец, ако:
36) изврши привремено ограничување или прекин на пристап, спротивно на членот 115 од овој закон;
(2) Глоба во износ од 30 % од одмерената глоба за правното лице, односно за трговецот поединец ќе му се изрече и на одговорното лице во правното лице, односно на одговорното лице во трговецот поединец за прекршоците од ставот 1 на овој член.
Член 186
(1) На правното лице за сторен прекршок од членовите 180, 181, 182,183 и 184 од овој закон покрај глобата ќе му се изрече и прекршочна санкција забрана на вршење на определена дејност во траење од шест месеци до три години, а може да му се изрече и прекршочна санкција одземање на предмети со кои е сторен прекршокот.
(2) На одговорното лице во правното лице за сторен прекршок од членовите 180, 181, 182, 183 и 184 од овој закон, покрај глобата, ќе му се изрече и прекршочна санкција забрана за вршење на професија, дејност или должност во траење од три месеци до една година.
(3) На трговец поединец за сторен прекршок од членовите 180, 181, 182, 183 и 184 од овој закон, покрај глобата ќе му се изрече и прекршочна санкција забрана за вршење на професија, дејност или должност во траење од три месеци до една година, а може да му се изрече прекршочна санкција одземање на предмети со кои е сторен прекршокот.
Исклучувањето на сите ТВ-програми, освен на националниот сервис МРТВ, во времетраење од еден час, операторите го најавуваат бидејќи, како што велат, им се наметнува обврска да гарантираат за авторските права на програмите кои тие само ги реемитуваат и за тоа се бара да сносат кривична и материјална одговорност. Реемитувањето на програмите и авторските права, според нив, е во согласност со ЕУ стандардите и веќе е регулирано со закон. Дополнително, тие се жалат дека со Уредба донесена во вонредната состојба им се наметнува уште една обврска односно да ги пререгистрираат веќе регистрираните странски канали во рок од 60 дена.
Тие реагираа дека тоа е противуставно, а за своите корисници најавија дека ќе следува обесштетување во месечните претплати.