Покрај средбите со државниот врв и обраќањето пред пратениците во Собранието, генсекот на НАТО денеска ќе ја посети и касарната „Илинден“, каде што ќе присуствува на презентацијата на лесна пешадиска баталјонска група на Армијата
Генералниот секретар на НАТО, Марк Руте, денеска ќе престојува во официјална посета на Македонија, што е негова прва посета на земјава како шеф на Алијансата.
Руте ќе биде пречекан од претседателката Гордана Сиљановска-Давкова со највисоки државни и воени почести. Потоа ќе следува тет-а-тет средба и пленарен состанок на македонската и делегацијата на НАТО, а нешто пред 13 часот попладнево Сиљановска-Давкова и Руте ќе одржат заедничка прес-конференција.
Во агендата на генсекот на НАТО се предвидени и средби со премиерот Христијан Мицкоски и со претседателот на Собранието, Африм Гаши, како и обраќање пред пратениците во законодавниот дом.
За време на престојот на Скопје, Руте ќе ја посети и касарната „Илинден“, каде што ќе присуствува на презентацијата на лесна пешадиска баталјонска група на Армијата и на дел од опремата на оваа единица. На настанот ќе присуствуваат министерот за одбрана Владо Мисајловски, началникот на Генералштабот, генерал-мајор Сашко Лафчиски, генерали во Армијата и претставници од Министерството за одбрана.
Поради доаѓањето на Руте, денеска во Скопје ќе важи посебен режим на сообраќајот.