„Беше истакнато дека продолжената блиска соработка е од суштинско значење за мирот и одвраќањето. Воедно, беше нагласено дека иранскиот народ, како и сите народи во регионот, заслужува мир, стабилност и можност за просперитет“, се наведува во соопштението од Министерството за надворешни работи и надворешна трговија
Министерот за надворешни работи и надворешна трговија Тимчо Муцунски попладнево имал телефонски разговарал со својот израелски колега Гидеон Саар, во кој била реафирмирана поддршката за, како што се вели во соопштението на МНР, координираните напори на Соединетите Американски Држави и Израел во однос на Иран.
Во конструктивниот разговор, како што наведуваат од ресорното министерството, била реафирмирана и неопходноста од зачувување на регионалната стабилност и безбедност.
„Беше истакнато дека продолжената блиска соработка е од суштинско значење за мирот и одвраќањето. Воедно, беше нагласено дека иранскиот народ, како и сите народи во регионот, заслужува мир, стабилност и можност за просперитет“,
се наведува во соопштението.
Претходно шефот на македонската дипломатија, Муцунски, преку социјалната мрежа Икс, изрази јасна поддршка за сојузничката координација во, како што напиша тој, справувањето со дестабилизирачките закани на Блискиот Исток. Истовремено, во објавата, тој ги осуди контра нападите од Иран врз Израел и врз американските бази во регионот.
САД и Израел во заедничка акција денеска го нападнаа Иран. Американскиот претседател Доналд Трамп изјави дека започнале големи борбени операции во Иран и најави целосно уништување на нивната ракетна индустрија. Тој вели дека САД преземаат масовна операција за, како што посочи тој, да спречат оваа радикална диктатура да ја загрози Америка.
Нападите доаѓаат по третата рунда индиректни разговори за нуклеарната програма на Техеран, која пред два дена се одржаа во Женева, меѓу претставници на САД и Иран, а заврши без конкретен договор.
Власта во Техеран вели дека иако знаела за намерите на САД и Израел за напад, сепак влегла во преговори за нуклеарната програма за да демонстрира нелегитимност на секој изговор за агресија.
Поради ситуацијата на Блискиот Исток, Министерството за надворешни работи и надворешна трговија во рамките на институцијата формира кризен штаб кој, како што соопштија оттаму, континуирано ја следи состојбата и е достапен 24 часа за сите потреби поврзани со помош, поддршка и асистенција на македонските државјани кои се наоѓаат во регионот.
Од Министерството апелираа до сите македонски државјани кои се наоѓаат во погодените подрачја внимателно да ги следат официјалните известувања на надлежните институции и строго да постапуваат согласно безбедносните протоколи.
Досега единаесет македонски државјани официјално побарале евакуација од Израел, преку дипломатско-конзуларното претставништво во Тел Авив.
Покрај преку Амбасадата во Тел Авив, Министерството е во континуирана комуникација и е целосно на располагање на македонските државјани за потребна помош и координација и преку дипломатско-конзуларните претставништво во Доха (Катар) и Абу Даби (Обединетите Арапски Емирати).