Образложувајќи ги предлог-законските решенија, пратеникот Бојан Стојаноски од ВМРО-ДПМНЕ рече дека со измените се воспоставуваат реални висини на платите, а целта, меѓу другото, е намалување на буџетскиот товар. Законското решение, вели Стојаноски, е во согласност со Уставот и не може да се обжали пред Уставниот суд
Пратениците на денешната седница ја утврдија потребата од носењето на пакетот законски измени со кои се нивелираат платите на избраните и именуваните лица. Со измените на шесте закони – меѓу кои за пратениците, избраните и именуваните лица, судиите, јавните обвинители и членовите на судскиот и обвинителскиот совет – се предвидува намалување на нивните плати од 10 до 13 илјади денари.
По одржување на матичните собраниски комисии, се очекува пленарната седница да продолжи во 18:30 часот.
Образложувајќи ги предлог-законските решенија, пратеникот Бојан Стојаноски од ВМРО-ДПМНЕ рече дека со измените се воспоставуваат реални висини на платите, а целта, меѓу другото, е намалување на буџетскиот товар. Законското решение, вели Стојаноски, е во согласност со Уставот и не може да се обжали пред Уставниот суд.
„Со овие измени, за пратениците и функционерите во извршната власт ги намалуваме коефициентите, со што директно го кратиме буџетскиот товар, за судиите и јавните обвинители предвидуваме усогласување на коефициентите со цел нивните плати да бидат во корелација со реалните економски можности на државата, додека за градоначалниците предлагаме нова скала на коефициенти, зависно од бројот на жители во општините“.
изјави Стојаноски од собраниската говорница.
Претходно вчера, законските измени предложени од СДСМ и од Левица за зголемување на минималната плата на 600 евра не го поминаа комисискиот филтер во Собранието. Членовите на собраниската Комисија не го прифатија ниту предлогот на координаторот на пратеничката група на СДСМ, Оливер Спасовски, за одржување јавна расправа и обид за постигнување договор меѓу трите засегнати страни за зголемување на минималната плата.