„Пеш преминал преку граница и побегнал. А бил на стоп-листа. Сега, после 14 месеци бегство – се враќа и му се одредува куќен притвор. На кого уште не му е јасно ова сценарио? Ништо не е случајно. Ова е дел од договорот меѓу ДУИ и ВМРО-ОКГ. Останува само да видиме која е цената“, велат од СДСМ
Според ВМРО-ДПМНЕ, опозициската партија сите свои забелешки треба да ги испрати до Обвинителството, односно, како што велат оттаму, омилените обвинители на лидерот на СДСМ, Венко Филипче
По одлуката на Кривичниот суд да го прифати предлогот на Обвинителството на Артан Груби да му биде одреден куќен притвор, опозицискиот Социјалдемократски сојуз на Македонија (СДСМ) и владејачката ВМРО-ДПМНЕ се огласија со свои коментари во врска со денешниот расплет на настаните поврзани враќањето од бегство на поранешниот први вицепремиер и министер.
Од СДСМ велат дека како и враќањето на Груби во земјава по 14 месеци бегство, така и определувањето на мерката куќен притвор вечерва е потврда дека станува збор за договорено сценарио меѓу ВМРО-ДПМНЕ и Демократската унија за интеграција (ДУИ).
Според социјалдемократите од Бихаќка затоа судството и обвинителството се ставени под контрола на лидерот на ВМРО-ДПМНЕ и премиер, Христијан Мицкоски, а договорот меѓу владејачката партија и ДУИ се спроведува пред очите на јавноста.
„Прво со договореното враќање и режираното снимање на граничниот премин. Не работеа камерите кога Груби си замина преку граница, слободно, со пасош, иако бил на ‘стоп-листата’. Но, за договореното враќање на Груби камери има на секој чекор – од граница, пречек, па сè до Обвинителството и Судот. Потоа следуваше веќе подготвената кампања по медиумите под контрола на Орбан, а сега и одлуките за куќен притвор“,
велат од СДСМ.
Во таа смисла, оттаму прашуваат зошто ако некој еднаш избегал од државата, сега му се одредува куќен притвор.
„Пеш преминал преку граница и побегнал. А бил на стоп-листа. Сега, после 14 месеци бегство – се враќа и му се одредува куќен притвор. На кого уште не му е јасно ова сценарио? Ништо не е случајно. Ова е дел од договорот меѓу ДУИ и ВМРО-ОКГ. Останува само да видиме која е цената“,
додаваат од Бихаќка.
Од владејчката партија, пак, велат дека одлуката Груби да оди во куќен притвор била на Обвинителствот „со два проценти доверба“, за кое, како што додаваат, СДСМ се борел до последен здив, да остане непроменето.
Според ВМРО-ДПМНЕ, опозициската партија сите свои забелешки треба да ги испрати до Обвинителството, односно, како што велат оттаму, омилените обвинители на лидерот на СДСМ, Венко Филипче.
„СДС треба да се договори со себе бидејќи се исклучително недоследни. Изутрина тврдат дека ДУИ одработува за ВМРО-ДПМНЕ, а сега дека е обратно. А всушност СДС се вистински во паника затоа што нивниот криминоген другар Артан Груби може да проговори за сите ортачки криминали на владите на Зоран и Вице, на Венко и Ковачевски, за бизнисите на Зечевиќ. Зошто врхушката на СДС денес заседаваше и ‘вртеше’ телефони интересирајќи се за исказот на Артан Груби во Обвинителството. Ова е и причината зошто СДС во случајот со Груби се однесува по логиката иста на онаа: ‘крадецот вели држете го крадецот’“,
се вели во реакцијата на владејачката партија.
Оттаму додаваат дека „црната кутија за криминалите на СДС и ДУИ“ паднала и оти, како што велат, прашање на време е кога „исплашените“ од СДСМ ќе му прават друштво на Артан Груби во судските клупи.
Од Основниот кривичен суд Скопје доцна вечерва соопштија дека судија на претходна постапка по сослушувањето на Груби донел решение со кое го прифатил предлогот на јавниот обвинител и одбраната за определување мерка куќен притвор со дополнителни мерки за обезбедување на неговото присуство.
Одлуката уследи откако претходно поранешниот висок државен функционер од редовите на ДУИ помина речиси шест часа во Обвинителството, каде беше спроведен на распит, по неговото ненадејно појавување на граничниот премин Блаце по повеќе од една година бегство.
Од Обвинителството информираат дека Груби на негово барање почнал со увид во доказниот материјал за случајот „Лотарија“ во кој е осомничен, но поради неговата обемност со увидот ќе продолжи и во наредните денови по што ќе даде одбрана.
Во однос на предлогот мерката ефективен притвор да му биде заменета со куќен притвор, од Обвинителството наведоа дека таквата одлука надлежниот обвинител ја донел бидејќи најголем дел од доказите биле обезбедени во текот на досегашната постапка, а било земено предвид и тоа што Груби доброволно се пријавил на органите на прогонот. Дополнително, според Обвинителството, постојат индиции дека на поранешниот прв вицепремиер не може да му се гарантира личната безбедност во притворското одделение во затворот „Скопје“.
Груби денеска наутро во 6:10 часот, како што соопшти Министерството за внатрешни работи, се појавил на косовско-македонската граница при влез во земјава на граничниот премин „Блаце“.
Тој беше однесен во затворот „Скопје“, во населбата Шуто Оризари, а потоа оттаму однесен на распит во Основното јавно обвинителство Скопје.
На социјалните мрежи и во дел од медиумите беше објавено видео од приведувањето на Груби на „Блаце“ на кое се гледа како тој, со јакна со качулка на главата и очила за сонце, со насмевка им ги подава рацете на полициските службеници кои му ставаат лисици. Потоа се гледа, како тој со црн шал си ги покрива дланките.
Груби е второосомничен во случајот со проневери во „Државна лотарија“. Тој ја напушти земјава пред Обвинителството официјално да отвори истрага, а успеа да излезе од државата и да влезе во Косово и покрај тоа што беше на т.н. „стоп-листа“. Груби тврдеше дека не избегал, туку дека бил во приватна посета на Косово, наведувајќи дека штом ги заврши обврските ќе се врати дома.
Првоосомничен во случајот е поранешниот директор на „Државна лотарија“ Перпарим Бајрами, кој сè уште е недостапен за органите на прогонот. И тој и Груби се товарат за кривичното дело проневера во службата, со кое предизвикале штета од 8,1 милион евра на акционерското друштво во државна сопственост.